वीरगंज । वीरगंजमा एक समूहको कुटपिटबाट एक युवकको ज्यान गएको छ । वीरगंज महानगरपालिका वडा नं. ९ श्रीपुरस्थित भारतीय राजदूतावास पछाडिको एक घरमा भएको कुटपिटबाट पर्साको कालिकामाई गाउँपालिका वडा नं. १ मुडली निवासी २७ वर्षीय विकास चौरसियाको मृत्यु भएको प्रहरीले जनाएको छ।
स्थानीयका अनुसार घटनामा संलग्न तीन जना पुरुष र एक जना महिलालाई प्रहरीले नियन्त्रणमा लिएको छ । मृत्यु हुने चौरसिया नेपाल प्रहरीका कर्मचारी रहेको बताइएको छ ।
राैतहट घर भएका एक परिवारले डेरा लिएर बसेको कोठामा भएको विवादका क्रममा झगडा बढ्दै जाँदा कुटपिट भएको र सो क्रममा भएकाे रड प्रहार उनको ज्यान गएको प्रारम्भिक जानकारी प्राप्त भएको छ।
घटनाबारे थप विवरण बुझ्न जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतसँग सम्पर्क गर्न खोज्दा फोन नउठेका कारण सम्पर्क हुन सकेन । प्रहरीले घटनाको थप अनुसन्धान गरिरहेको जनाएको छ ।
