वीरगंज । बाराको परवानीपुर गाउँपालिका–१, रहरिया टोलमा गएराति आमाछोराको हत्या भएको घटनामा प्रहरीले शंकाको आधारमा बुहारीलाई नियन्त्रणमा लिएको छ । अज्ञात व्यक्तिको आक्रमणबाट ४६ वर्षीया सुमित्रा देवी र उनका ३० वर्षीय छोरा रामेश्वर मण्डलको धारिलो हतियार प्रहार गरी हत्या भएको हो।
घटनासँग सम्बन्धित शंकाका आधारमा २८ वर्षीया बुहारी मनिता देवीलाई प्रहरीले नियन्त्रणमा लिएर सोधपुछ गरिरहेको बाराका प्रहरी उपरीक्षक नरेन्द्र कुँवरले जानकारी दिए । “घटना कसरी र किन भएको हो भन्ने विषयमा बुहारीलाई नियन्त्रणमा लिएर अनुसन्धान सुरु गरेका छौँ। उनको बयानपछि थप तथ्य खुल्नेछ,” प्रहरी उपरीक्षक कुँवरले बताए।
प्रहरीका अनुसार बुधबार राति करिब २ बजेको समयमा अज्ञात व्यक्ति घरभित्र प्रवेश गरी सुतिरहेको अवस्थामा आमाछोरामाथि धारिलो हतियारले आक्रमण गरिएको थियो। आक्रमणपछि सुमित्रा देवी र रामेश्वर मण्डलको घटनास्थलमै मृत्यु भएको र उनीहरूको शव घरमै फेला परेको प्रहरीले जनाएको छ।
यसै घटनामा आक्रमणबाट घाइते भएका ५० वर्षीय जगरूप महतोको वीरगंजस्थित एलएस न्युरो अस्पतालमा उपचार भइरहेको छ। घटनाको कारण र संलग्न व्यक्तिबारे यकिन गर्न प्रहरी टोली घटनास्थलमै पुगेर थप अनुसन्धान तथा प्रमाण संकलनमा जुटिरहेको प्रहरीले जनाएको छ।
