काठमाडौं । नेपाल विश्व हिन्दु महासंघले काठमाडौंमा रिपोर्टर्स क्लबमा आयोजित एक कार्यक्रममा मुस्लिम समुदायका अगुवाहरूले गरेको वक्तव्यप्रति गम्भीर ध्यानाकर्षण भएको जनाएको छ। महासंघका अनुसार उक्त कार्यक्रममा देशमा मुस्लिम धर्मावलम्बीको संख्या ४० लाख पुगेको दाबी तथा “भोलि मुसलमान उत्रिनु पर्यो भने देशको अवस्था के हुन्छ” भन्ने भाषाबाट कानुनी राज्यको ठाडो उपहास भएको छ।
राष्ट्रिय जनगणना अनुसार हाल देशमा मुस्लिम धर्मावलम्बीको जनसंख्या ५.०९ प्रतिशत अर्थात् १४ लाख ८३ हजार रहेको भए पनि ४० लाखको दाबीले गम्भीर आशंका उत्पन्न गराएको महासंघको भनाइ छ। महासंघले सो दाबीका आधार, तथ्यांक तथा प्रस्तुत गरिएको जनसङ्ख्याको वास्तविकता बारे राज्यले तत्काल प्रष्ट पार्नुपर्ने माग गरेको छ।
महासंघले अवैध घुसपैठ, विशेषतः रोहिंग्या मुस्लिमहरूको सम्भावित प्रवेशले राष्ट्रिय सुरक्षामा खतरा निम्त्याउन सक्ने बताउँदै, छिमेकी भारतमा SIR प्रणालीमार्फत बंगलादेशी तथा रोहिंग्याहरूलाई देशनिकाला गरिएको उदाहरण प्रस्तुत गरेको छ। खुला सीमाका कारण नेपालमा समेत यस्तो घुसपैठ हुनसक्ने सम्भावना उच्च रहेको महासंघको तर्क छ।
“यस विषयमा राज्यका सम्बद्ध निकायले तत्काल आवश्यक कदम चाल्नुपर्ने” महासंघका महासचिव डा. अभिषेक तिवारीद्वारा जारी विज्ञप्तिमा उल्लेख गरिएको छ।
