रौतहट । रौतहटको गौर नगरपालिका–१ कानुपट्टीस्थित नेपाल–भारत सीमा क्षेत्रबाट सुरक्षाकर्मीले ९ एमएमका २७ थान गोली बरामद गरेका छन्।
मंगलबार सीमा क्षेत्रमा गस्ती गर्ने क्रममा सशस्त्र प्रहरीको सीमा सुरक्षा गुल्म हेडक्वार्टर गौर र भन्सार सुरक्षा गार्डबाट खटिएको संयुक्त टोलीले गोली बरामद गरेको हो।
गस्तीमा रहेका सुरक्षाकर्मीलाई देख्नासाथ एक युवकले झोला फ्याँकेर फरार भएको प्रहरीले जनाएको छ। सुरक्षाकर्मीले उक्त सेतो प्लास्टिकको झोला जाँच गर्दा ९ एमएम राउन्डजस्तो देखिने २७ थान गोली फेला पारेका थिए।
जिल्ला प्रहरी कार्यालय रौतहटका प्रहरी नायब उपरीक्षक लक्ष्मण शाहीका अनुसार बरामद गोली कसले र कुन प्रयोजनका लागि ल्याएको भन्ने खुल्न सकेको छैन।
घटनाबारे अनुसन्धान भइरहेको र आवश्यक कानुनी प्रक्रिया अघि बढाइएको प्रहरी नायब उपरीक्षक शाहीले जानकारी दिएका छन्।








