वीरगंज । मानव बेचबिखन र लैङ्गिक हिंसा अन्त्यका लागि “प्रविधिको सही प्रयोग गरौँ : लैङ्गिक हिंसा अन्त्य लागि गरौँ” भन्ने मूल नाराका साथ १६ दिने अभियान सोमबारदेखि वीरगंजमा सुरु गरिएको छ।
विभिन्न संघ–संस्था, स्थानीय निकाय, विद्यार्थी समूह तथा महिला अधिकारकर्मीहरूको सहभागितामा अभियानको पहिलो दिन प्रभातफेरी आयोजना गरिएको थियो।
प्रभातफेरीमा सहभागीहरूले “म हिंसा गर्दिन, म हिंसा सहन्न, हिंसा देखेमा प्रतिकार गर्छु” भन्ने प्रतिबद्धतासहित हस्ताक्षर अभियानमा सहभागिता जनाए। लैङ्गिक हिंसा विरुद्धको जनचेतना अभिवृद्धि तथा समाजमा सुरक्षित वातावरण निर्माण गर्ने उद्देश्यले सुरु गरिएको यस अभियानमा मानव बेचबिखन रोकथामसँग सम्बन्धित विषयमा विशेष रूपमा ध्यान केन्द्रित गरिएको छ।
कार्यक्रमका सहभागीहरूले सामाजिक सञ्जाल तथा प्रविधिको सही र सुरक्षित प्रयोगमार्फत हिंसा निरुत्साहित गर्दै कमजोर तथा जोखिममा रहेका समुदायलाई संरक्षण गर्न सबैलाई आह्वान गरेका छन्।
१६ दिने अभियानका क्रममा वीरगंज क्षेत्रमा जनचेतनामूलक कार्यक्रम, छलफल, तालिम, पोस्टर अभियान, सडक नाटक र परामर्श सेवा लगायतका गतिविधि सञ्चालन गरिने समाजिक संस्था जिल्ला समन्वय समिती पर्साका उपाध्यक्ष चन्देश चौहानले जानकारी दिए ।
अभियान शुभारम्भ कार्यक्रममा पर्साका प्रमुख जिल्ला अधिकारी भोला दाहाल, सशस्त्र प्रहरी उपरीक्षक पुरनचन्द्र भट्ट, समाजिक संंस्था जिल्ला समन्वय समिती पर्साका अध्यक्ष इब्राहिम देवान लगायतको उपस्थिति रहेको थियो ।
