वीरगंज । नेकपा (एमाले)का दुई केन्द्रीय सदस्यसहित फरक–फरक पार्टीका २८ युवाले जेनजी आन्दोलनको सन्देश नसुन्नु वा नबुझ्नु मुलुकका लागि घातक हुने चेतावनी दिएका छन्।
मंगलबार जारी गरिएको संयुक्त विज्ञप्तिमा उनीहरूले गत भदौ २३ र २४ गते भएको जेनजी आन्दोलनको मर्म र भावनालाई आत्मसात् गर्दै पार्टी र आन्दोलन पुनर्गठनका लागि नेतृत्वलाई आग्रह गरेका छन्।
विज्ञप्ति जारी गर्नेहरूमा एमालेका केन्द्रीय सदस्य उषाकिरण तिम्सेना र अरबिन्द सिंह, एकीकृत समाजवादीका अशेष घिमिरे र करूणा पराजुली, साथै अखिल क्रान्तिकारीका उपाध्यक्ष विराज थापा र ममता अधिकारीलगायत रहेका छन्।
उनीहरूले जेनजी आन्दोलनले ‘राज्य र पार्टी कब्जामा लिएपछि जे गरे पनि हुन्छ’ भन्ने राजनीतिक सम्भ्रान्तहरूलाई घुँडा टेकाएको दाबी गरेका छन्। लामो समयदेखि राजनीतिक सुधारको प्रयासमा लागिरहेका आफूहरूलाई यो आन्दोलनले गहिरो प्रभाव पारेको उल्लेख गर्दै उनीहरूले जेनजीको आन्दोलनप्रति उच्च सम्मान व्यक्त गरेका छन्।
विज्ञप्तिमा भनिएको छ, “यो परिस्थिति अचानक आएको होइन। राजनीतिमा संस्थागत भ्रष्टाचारविरुद्ध पार्टी कार्यकर्ता, नागरिक समाज, बुद्धिजीवी, सञ्चारमाध्यम तथा देशभित्र–बाहिर रहेका नेपालीहरूले आवाज उठाइरहेका थिए। राज्य र राजनीतिक जिम्मेवारहरूले ती आवाज नसुनेपछि अन्ततः विद्रोह अपरिहार्य भएको हो।”
उनीहरूले जेनजी आन्दोलनको मर्म र भावनालाई नबुझ्ने बहानाबाजीले देशलाई अझ ठूलो संकटतर्फ धकेल्ने चेतावनीसमेत दिएका छन्।
विज्ञप्तिमा भनिएको छ, “नेपाली जनता राजनीति, प्रशासन र न्यायपालिका लगायतका संरचनाहरूलाई भ्रष्टाचारमुक्त, पारदर्शी र परिणाममुखी रूपमा देख्न चाहन्छन्। जेनजी आन्दोलनले यही जनआकांक्षाको प्रतिविम्ब प्रस्तुत गरेको छ।”
