वीरगंज । घटस्थापनासँगै सुरु भएको ऐतिहासिक वीरगंज गहवामाई मेलामा खाद्य सामग्रीको गुणस्तर जाँच्न जिल्ला प्रशासन कार्यालय पर्सा र सरोकारवाला संस्थाहरूको संयुक्त टोलीले बुधबार २२ वटा मिठाई पसलको अनुगमन गरेको छ।
अनुगमनको क्रममा ७ वटा पसलमा प्रयोग गरिएको तेल गुणस्तरहीन पाइएको छ भने ५ वटा पसलमा प्रयोग गरिएको फुड कलर मापदण्डअनुसार नभएको भेटिएको हो। उपभोक्ता हित संरक्षण मञ्च पर्साका उपाध्यक्ष अजित भुजेलका अनुसार गुणस्तरहीन तेल र फुड कलर प्रयोग भएका सामग्री तत्काल नष्ट गराइ पसल सञ्चालकलाई चेतावनी दिइएको छ।
अनुगमन टोलीमा खाद्य निरीक्षण अधिकारी सोनु साह, उपभोक्ता हित संरक्षण मञ्च पर्साका उपाध्यक्ष अजित भुजेल, वीरगंज महानगरपालिकाका प्रतिनिधि विभा मिश्र र वीरगंज उद्योग वाणिज्य संघका प्रतिनिधि मनोज कुमार दास सहभागी थिए।
खाद्य निरीक्षण अधिकारी सोनु साहका अनुसार मेलामा बिक्री भईरहेका खाद्य पदार्थहरूको गुणस्तर जाँच गरी उपभोक्तालाई सुरक्षित र गुणस्तरीय खाना उपलब्ध गराउन अनुगमनलाई दशैंभर निरन्तर जारी राखिनेछ। जिल्ला प्रशासन कार्यालयले उपभोक्ताको स्वास्थ्य सुरक्षाका लागि अनुगमनलाई अझ कडा बनाइने जनाएको छ।
