वीरगंज । वीरगंज कारागारबाट फरार भएका कैदीलाई प्रहरीले पाँच घण्टाभित्रै भारतको सीमाक्षेत्रबाट पक्राउ गरेको छ ।
जबरजस्ती करणी मुद्दामा कैद भुक्तान गरिरहेका पर्साको पोखरिया नगरपालिका–४ सतवरिया निवासी ३० वर्षीय सुनिल साह तुरहालाई प्रहरीले भारतको बिहारस्थित मोतिहारी जिल्लाको आदापुर थाना क्षेत्रबाट नियन्त्रणमा लिएको हो ।
जिल्ला प्रहरी कार्यालय पर्साका अनुसार बिहीबार बिहान करिब ८ः२० बजे कारागार कार्यालयको प्यारोल शाखाको पर्खाल छेउबाट साह फरार भएका थिए । उनी फरार भएको सूचना प्राप्त हुनासाथ जिल्ला प्रहरी कार्यालयबाट प्रहरी टोली परिचालन गरिएको थियो ।
प्रहरी टोलीले खोजतलास गर्ने क्रममा नेपाल–भारत सीमा क्षेत्रअन्तर्गत भारतको बिहारस्थित आदापुरबाट उनलाई पक्राउ गरेको जिल्ला प्रहरी कार्यालय पर्साका प्रवक्ता प्रहरी नायव उपरीक्षक चक्रबहादुर मल्लले जानकारी दिए ।
पक्राउ परेका साहलाई जिल्ला प्रहरी कार्यालय पर्सामा ल्याई थप अनुसन्धान भइरहेको प्रहरीले जनाएको छ ।
