वीरगंज । पर्साको कालिकामाई गाउँपालिकाको कार्यालयमा अज्ञात समूहले आगजनी गरेको छ । बुधबार राति वडा नम्बर ३ हरिहरपुरवीर्तास्थित गाउँ कार्यपालिकाको कार्यालयमा प्रवेश गरी समूहले आगजनी गरेको हो ।
पर्खाल नाघेर कार्यालय परिसरमा प्रवेश गरेको समूहले मुख्य गेटको ताल्चा खोलेर स्वास्थ्य, रोजगारलगायतका शाखामा आगजनी गरेको प्रहरीले जनाएको छ ।
आगजनीबाट ती शाखामा रहेका कुर्सी, टेबललगायत फर्निचर, एसी, कम्प्युटर तथा महत्त्वपूर्ण कागजपत्र जलेर नष्ट भएका छन् । इलाका प्रहरी कार्यालय पोखरियाका प्रहरी निरीक्षक भानुभक्त अर्यालका अनुसार आगजनी गरिएका शाखाका ढोकाको ताल्चासमेत खोलेर भित्र प्रवेश गरी मोबिल छर्केर आगो लगाइएको पाइएको छ ।
बिहीबार बिहान गाउँपालिकामा कार्यरत जेसीबी चालक कार्यालय परिसरको मुख्य गेट खोलेर भित्र प्रवेश गर्दा आगजनी भएको देखेपछि गाउँपालिका अध्यक्ष वशिष्ठ कलवारलाई खबर गरेका थिए । त्यसपछि प्रहरीलाई जानकारी गराइएको थियो ।
खबर पाएलगत्तै प्रहरी निरीक्षक अर्यालको नेतृत्वमा प्रहरी टोली घटनास्थल पुगेको थियो । आगजनी कसले र किन गरेको भन्ने विषयमा अहिलेसम्म खुल्न नसकेको र घटनाबारे अनुसन्धान भइरहेको प्रहरीले जनाएको छ ।
यसैबीच, आगजनीको खबर पाएपछि बिहीबार बिहान कार्यालय पुगेका गाउँपालिका अध्यक्ष कलवारलाई स्थानीय एक समुहले घेराउ गर्दै दुर्व्यवहारको प्रयास गरेका थिए । त्यसपछि केहीबेर कार्यालय परिसरको अवस्था तनावग्रस्त बनेको थियो । प्रहरीले अध्यक्ष कलवारलाई आफ्नै गाडीमा राखेर सुरक्षित रूपमा त्यहाँबाट बाहिर लगेको थियो ।
