वीरगन्ज। वीरगन्ज महानगरपालिका–२२ मनियारीमा छठ पर्वको अवसरमा आर्थिक रूपमा विपन्न ३५० जना महिलालाई नयाँ साडी तथा गहुँको पीठो वितरण गरिएको छ।
पूर्वमन्त्री प्रदीप यादवको पहलमा रुंगटा वेलफेयर सोसाइटीले बिहीबार छठ पर्वमा व्रत बस्ने दलित तथा अन्य समुदायका विपन्न महिलालाई साडी र पूजाका सामग्री वितरण गरेको हो।
सोसाइटीका अध्यक्ष सुरेश रुंगटाका अनुसार ३५० जना महिलालाई जनही एक थान नयाँ साडी र छठ पूजाको प्रसाद बनाउनका लागि दुई–दुई किलो गहुँको पीठो प्रदान गरिएको छ।
छठ पर्व धार्मिक आस्थासँगै मानवीय सहयोग र सहानुभूतिको पर्व पनि भएकाले आर्थिक रूपमा कमजोर समुदायका महिलासँग पर्वको खुसी बाँड्न पाउनु गर्वको विषय भएको अध्यक्ष रुंगटाले बताए।
उनले रुंगटा वेलफेयर सोसाइटीले विगतदेखि नै विपन्न, असहाय तथा सहयोग आवश्यक भएका व्यक्तिहरूलाई लक्षित गरी विभिन्न मानवीय सेवाका कार्यक्रम सञ्चालन गर्दै आएको र आगामी दिनमा पनि यस्ता कार्यलाई निरन्तरता दिने प्रतिबद्धता व्यक्त गरे।
यसअघि गत मंगलबार पनि सोसाइटीले वीरगन्ज कारागारमा रहेका ६३ जना महिला कैदीबन्दीलाई छठ पर्व मनाउन जनही एक–एक थान साडी वितरण गरेको थियो।
