वीरगंज । राष्ट्रिय निजी तथा आवासीय विद्यालय एशोसिएसन नेपाल (एन प्याब्सन), वीरगंजले हाल देशभर चलिरहेको GenZ आन्दोलनका क्रममा वीरगति प्राप्त शहीदहरूप्रति गहिरो श्रद्धाञ्जली अर्पण गरेको छ । एन प्याब्सन वीरगंज महानगर अध्यक्ष जियालाल गुप्ता र नगर सचिव शेख अजहरद्वारा जारी संयुक्त विज्ञप्तिमा शोकसन्तप्त परिवारजनलाई धैर्य र शक्ति प्राप्त होस् भन्दै हार्दिक समवेदना व्यक्त गरिएको छ । साथै आन्दोलनमा गम्भीर घाइते भएकाहरूको शीघ्र स्वास्थ्यलाभको पनि कामना गरिएको छ।
विज्ञप्तिमा भनिएको छ, “यो ऐतिहासिक आन्दोलनले नेपाली जनतामा समानता, सुशासन, शैक्षिक सुधार, रोजगारी, सामाजिक न्याय र पारदर्शी शासनको नयाँ चेतना जागृत गरेको छ। शिक्षा नै राष्ट्र निर्माणको आधार भएकाले शिक्षा क्षेत्रलाई अझ सबल, गुणस्तरीय र पहुँचयोग्य बनाउन सबै जिम्मेवार र उत्तरदायी हुन आवश्यक छ।”
एन प्याब्सनले लामो समयदेखि निर्वाह गर्दै आएको शैक्षिक योगदानलाई उपेक्षा गरेर आजका विद्यार्थीहरूलाई शिक्षाबाट वञ्चित गर्नु अस्वीकार्य रहेको जनाएको छ। विद्यालय बन्द हुँदा बालबालिकाको शैक्षिक अधिकारमा गम्भीर आघात पुगेको र यसको दीर्घकालीन असर पर्ने चेतावनी समेत दिएको छ।
विज्ञप्तिमा तीनबुँदे धारणा स्पष्ट पारिएको छ :
१. बालबालिकाको शैक्षिक अधिकारलाई कुनै पनि राजनीतिक, सामाजिक वा आन्दोलनका कारण रोक्न नहुने।
२. सरकार, शिक्षक, अभिभावक र सम्पूर्ण समाजले शिक्षा क्षेत्रलाई पहिलो प्राथमिकता दिनुपर्ने।
३. शैक्षिक संस्थानहरूलाई अविच्छिन्न सञ्चालन गर्न सकिने वातावरण राज्यले तत्काल सुनिश्चित गर्नुपर्ने।
एन प्याब्सन वीरग|h शहीदहरूको बलिदानलाई सम्मान गर्दै शिक्षा क्षेत्रलाई अवरोधमुक्त बनाउन सम्पूर्ण सरोकारवालासँग गम्भीर आग्रह गरेको छ । संगठनका अनुसार शिक्षा नै उज्ज्वल भविष्यको आधार हो र गुणस्तरीय शिक्षा, सामाजिक न्याय तथा पारदर्शी शासन स्थापना गर्ने जिम्मेवारी सबैले साझा रूपमा लिनुपर्ने समय आएको छ ।
