वीरगंज । राष्ट्रिय निजी तथा आवासीय विद्यालय एशोसिएशन नेपाल (एन प्याब्सन) पर्साले शुक्रबार (भदौ ६ गते) हुने भनिएको ९औं जिल्ला तथा २औं नगर अधिवेशन स्थगित गर्ने निर्णय गरेको छ ।
संघका केन्द्रीय संस्थापक सदस्य एवं केन्द्रीय वरिष्ठ उपाध्यक्ष रामविनय चौरसियाले जारी गरेको प्रेस विज्ञप्तिमा भनिएको छ, “विद्यालय सम्बन्धी कानुनलाई संशोधन र एकीकरण गर्न बनेको विधेयक–२०८० मा समावेश गरिएका कतिपय प्रावधानहरू निजी लगानीका विद्यालयहरू प्रति अव्यवहारिक रहेका छन् । सरोकारवालाको सुझावलाई बेवास्ता गर्दै सरकारले विधेयक अगाडि बढाएको विषयप्रति हाम्रो गम्भीर ध्यानाकर्षण भएको छ।”
उनले विज्ञप्तिमा सरकारसँग सरोकारवालासँग छलफल गरी मात्र विधेयक अघि बढाउन माग गरिएको उल्लेख गरेका छन् । यसै सन्दर्भमा, देशभरका निजी विद्यालयको आन्दोलनलाई सघाउन र हालको विषम परिस्थितिलाई ध्यानमा राख्दै केन्द्रीय समितिको निर्देशन र संस्थापक प्राचार्यहरूको सल्लाहअनुसार अधिवेशन अर्को सूचना नआएसम्मका लागि स्थगित गरिएको केन्द्रीय वरिष्ठ उपाध्यक्ष चौरसियाले जानकारी दिए ।
