वीरगंज । बारा प्रहरीले लागु औषधसहित दुई जनालाई पक्राउ गरेकाे छ । पक्राउ पर्नेमा मकवानपुरकाे हेटौडा उपमहानगरपालिका वडा नं. १३ का २४ बर्षिय सुभ राज मोक्तान र कलैया उपमहानगरपालिका कै वडा नं. ४ का २२ बर्षिय निरज गोले रहेका छन् ।

विशेष सूचनाको आधारमा मंगलबार दिउसाे ४:३० बजेको समयमा ईलाका प्रहरी कार्यालय अमलेखगंज र प्रहरी चौकी पथलैया बाराबाट खटिएको संयुक्त प्रहरी टोलीले जीतपुर सिमरा उप-महानगरपालिकाकाे वडा नं.२१ अमलेखगंजबाट दुबै जनालाई नियन्त्रणमा लिएकाे जिल्ला प्रहरी कार्यालय बाराले जनाएकाे छ ।

वीरगंजबाट हेटौडा तर्फ जाँदै गरेको ना ४३ प २०२ नम्बरकाे मोटरसाइकल शंकास्पद लागि रोकी चेक जाँच गर्दा पेट्रोल टंयाकी भित्र लुकाई छिपाई राखेको लागु औषध ओनेरेक्स सिरफ १०० एमएलकाे ३९ बाेत्तल वरामद भएकाे जिल्ला प्रहरी कार्यालय बाराका प्रवक्ता प्रहरी नायब उपरिक्षक दधिराम न्याैपानेले जानकारी दिए ।

त्यसपछि उक्त लागु औषधसहित माेटरसाइकल चालक माेक्तान र माेटरसाइकलकाे पछाडी सवार गाेलेलाई नियन्त्रणमा लिई लागु औषध मुद्दा दर्ता गरी बारा जिल्ला अदालत, कलैयाबाट ५ दिन म्याद थप गरि अनुसन्धान कार्य भई रहेको प्रवक्ता न्याैपानेले वताए ।

वीरगंज । बारा प्रहरीले श्रोत नखुलेको १३ लाख ५० हजार रुपैयाँसहित दुई जनालाई पक्राउ गरेको छ । पक्राउ पर्नेमा पर्साको पोखरिया नगरपालिका-१ बनकटवाका ३४ वर्षीय हरिकिशोर पटेल र बाराको महागढीमाई नगरपालिका-१ का ४२ वर्षीय रमेश कुशवाहा रहेका छन् । उनीहरुको साथबाट प्रहरीले श्रोत खुल्न नसकेको नेपाली नगद १३ लाख ५० हजार रुपैयाँ बरामद गरिएको बाराका प्रहरी प्रवक्ता प्रहरी नायब उपरीक्षक दधिराम न्यौपानेले जानकारी दिए ।

उनका अनुसार, विशेष सूचनाको आधारमा सोमबार जिल्ला प्रहरी कार्यालय बाराबाट खटिएको प्रहरी टोली भारतीय सीमासँग जोडिएको बाराको विश्रामपुर गाँउपालिका-४ मुसहर्वा स्थितबाट भारतबाट नेपाल प्रवेश गर्दै गरेको प्रदेश २-०३-०१६ प २३३७ नम्बरको मोटरसाइकललाई रोकेर चेकजाँच गर्दा श्रोत नखुलेको रकम बरामद भएको थियो । मोटरसाइकलमा सवार हरिकिशोर पटेलको साथबाट बरामद भएको १३ लाख ५० हजार रुपैयाँको श्रोत खुलाउन नसकेकाले पटेललाई प्रहरीले रकमसहित नियन्त्रणमा लिएको थियो ।

बरामद गरिएको रकम सहित पटेललाई जिल्ला प्रहरी कार्यालय बाराको हिरासतमा राखेर अनुसन्धान गर्दा उनले दिएको बयानको आधारमा यस कार्यमा संलग्न कुशवाहालाई पनि सोमबार नै पक्राउ गरिएको प्रहरी नायब उपरीक्षक न्यौपानेले जानकारी दिए । पटेलको साथबाट बरामद रकम हुण्डी कारोबारका लागि ल्याइए हुन सक्ने र पक्राउ परेका दुबैजना हुण्डी कारोबारमा संलग्न रहेको हुन सक्ने प्रहरी नायब उपरीक्षक न्यौपानले बताए । रकमसहित पक्राउ परेका दुवै जनालाई जिल्ला प्रहरी कार्यालय बाराको हिरासतमा राखेर थप अनुसन्धान भइरहेको डिएसपी न्यौपानेले बताए ।

वीरगंज । पर्सा प्रहरीले बैंकिङ कसूर मुद्दाका फरार प्रतिवादी एक जनालाई पक्राउ गरेकाे छ । 

जिल्ला प्रहरी कार्यालय पर्साबाट खटिएकाे प्रहरी टाेलीलले पर्साकाे धाेबिनी गाउँपालिका वडा नं. ३, हरिहरपुर निवासी ३० बर्षिय सुजित राउत कुर्मीलाई पक्राउ गरेकाे हाे । 

सूचना परिचालन तथा प्रहरी कारवाहीको सिलसिलामा शनिबार विहान ०९:३० बजेको समयमा कुर्मीलाई धाेबिनी गाउँपालिकाकाे वडा नं. ४ लंगडीबाट पक्राउ गरिएकाे जिल्ला प्रहरी कार्यालय पर्साका प्रवक्ता प्रहरी नायब उपरिक्षक कुमार बिक्रम थापाले जानकारी दिए ।

बैंकिङ कसुर मुद्दामा ३ दिन कैद र रु २५ लाख जरिवाना तोकि वारदात पश्चात फरार रहेका कुर्मी लुकीछिपी बस्दै आएको अवस्थाबाट पक्राउ गरी आवश्यक कारवाहीको लागि साेही दिन पर्सा जिल्ला अदालतमा उपस्थित गराइएको प्रवक्ता थापाले वताए ।