वीरगंज । जेन जि यूथ फोर्स पर्साले आफ्नो नाममा भ्रामक रूपमा नयाँ जिल्ला समिति गठन गर्ने भन्दै फैलाइएका सूचनाप्रति गम्भीर आपत्ति जनाएको छ ।

सोमबार जारी प्रेस विज्ञप्तिमार्फत संगठनले केही व्यक्तिहरूले राजनीतिक स्वार्थका लागि सामाजिक सञ्जालमा “जेन जि पर्सा गठन गर्दैछु” भन्ने गलत प्रचार गरिरहेको उल्लेख गर्दै उक्त दाबी पूर्णतः असत्य र भ्रम सिर्जना गर्ने खालको रहेको स्पष्ट पारेको छ ।

विज्ञप्तिमा जेन जि यूथ फोर्स पर्साको जिल्ला समिति पहिले नै विधिवत् रूपमा गठन भइसकेको जनाउँदै पुनः नयाँ समिति गठन गर्ने प्रयास केवल राजनीतिक चलखेल र संगठनको नाम दुरुपयोग गर्ने कार्य भएको बताइएको छ ।

संगठनले आफूलाई जेन जि अभियानको अगुवा बताउने केही व्यक्तिहरू वास्तविक जेन जि उमेर समूहमै नपर्ने र भदौ २३ गते सम्पन्न आन्दोलनमा समेत सहभागी नभएको दाबी गरेको छ । आन्दोलनलाई व्यक्तिगत स्वार्थ पूरा गर्ने माध्यम बनाउने प्रयासप्रति संगठनले कडा आपत्ति जनाएको छ ।

त्यस्तै, भदौ २३ गतेको आन्दोलन आधिकारिक रूपमा फिर्ता भइसकेको अवस्थामा भदौ २४ गते भएका गतिविधिमा संलग्न व्यक्तिहरूको जेन जि यूथ फोर्स पर्सासँग कुनै सम्बन्ध नरहेको स्पष्ट पारिएको छ । सो दिन सरकारी सम्पत्तिमा क्षति पुर्‍याउने कार्यमा संलग्न व्यक्तिहरू स्वयं जिम्मेवार रहने पनि विज्ञप्तिमा उल्लेख छ ।

जेन जि यूथ फोर्स पर्साले आफू सधैं शान्तिपूर्ण, जिम्मेवार र सकारात्मक सामाजिक परिवर्तनको पक्षमा रहेको जनाउँदै संगठनको नाम दुरुपयोग गर्ने, भ्रम फैलाउने तथा आन्दोलनलाई बदनाम गर्ने प्रयास स्वीकार्य नहुने चेतावनी दिएको छ ।

यस्ता गतिविधि दोहोरिएमा कडा विरोधमा उत्रिने र आवश्यक कदम चाल्न बाध्य हुने संगठनले जनाएको छ । साथै, आन्दोलन कुनै व्यक्तिको निजी स्वार्थ पूरा गर्ने माध्यम नभएको पनि संगठनले स्पष्ट पारेको छ ।

वीरगंज । जिल्ला प्रहरी कार्यालय पर्सामा प्रहरी कर्मचारीहरूको सुविधा, स्वच्छता तथा स्वास्थ्य प्रवर्द्धन गर्ने उद्देश्यले निर्माण गरिएको आधुनिक स्नान तथा शौचालय भवनको उद्घाटन गरिएको छ । “स्वच्छता नै स्वास्थ्यको आधार हो” भन्ने मूल मन्त्रलाई आत्मसात गर्दै नेपालमै पहिलो पटक डिजिटल प्रविधियुक्त अत्याधुनिक शौचालयसहितको भवन सोमबार एक विशेष कार्यक्रमबीच उद्घाटन गरिएको हो ।

उद्घाटन कार्यक्रममा बोल्दै प्रहरी उपरीक्षक सुदिप राज पाठकले यस्ता पूर्वाधारले प्रहरी कर्मचारीहरूको स्वास्थ्य, स्वच्छता र कार्यक्षमतामा सकारात्मक प्रभाव पार्ने विश्वास व्यक्त गरे । उनले भवन निर्माणमा सहयोग पुर्‍याउने संस्थाहरूप्रति आभार समेत व्यक्त गरे ।

उक्त भवन निर्माणमा रुङ्गटा वेलफेयर सोसाइटी तथा ग्रीन सिटी सामुदायिक प्रहरी सेवा केन्द्र आदर्शनगरको महत्वपूर्ण सहयोग रहेको थियो ।

कार्यक्रममा ग्रीन सिटी सामुदायिक प्रहरी सेवा केन्द्र आदर्शनगरका अध्यक्ष जय प्रकाश खेतान, रुङ्गटा वेलफेयर सोसाइटीका कोषाध्यक्ष सुरेश रुङ्गटा, लायन्स क्लब आदर्शनगरका प्रकाश बाहेती, जिल्ला प्रहरी कार्यालय पर्साका हरि बहादुर र राजु कार्की, जिल्ला ट्राफिक प्रहरी कार्यालयका प्रमुख युबराज कटवाल, वडा प्रहरी कार्यालय बिर्ताका प्रमुख बिक्रम सुबेदी, छपकैया सामुदायिक प्रहरीका अध्यक्ष गयासुदिन ठकुराई, आमा नेपाल फाउन्डेसनकी अध्यक्ष प्रबिता मान्धर, युवा नेता सुधिर पटेल, लायन्स क्लबका प्रिया सिंह लगायत विभिन्न व्यक्तित्वहरूको उपस्थिति रहेको थियो ।

कार्यक्रममा अध्यक्ष खेतानले समुदाय र सुरक्षाकर्मीबीचको सहकार्य अझ सुदृढ बनाउन यस्ता योजनाहरूले महत्वपूर्ण भूमिका खेल्ने धारणा राख्दै आगामी दिनमा पनि सामाजिक उत्तरदायित्व अन्तर्गत यस्ता रचनात्मक कार्यमा निरन्तर सहयोग रहने प्रतिबद्धता व्यक्त गरे ।