वीरगंज । वीरगंज महानगरपालिका–१४ गण्डकस्थित क्लर्क रिसोर्टमा रहेको गोल्डेन फिंगर गेमिङ जोन प्रालि. (क्यासिनो) बाट पक्राउ परेका सखुवा प्रसौनी गाउँपालिका अध्यक्ष जसवन्त यादवसहित आठै जना धरौटीमा रिहा भएका छन् ।
जिल्ला प्रशासन कार्यालय पर्साका अनुसार प्रमुख जिल्ला अधिकारी भोला दाहालको आदेशमा सोमबार अध्यक्ष यादवसहित पक्राउ परेका आठै जना धरौटी बुझाएर रिहा भएका हुन् ।
जिल्ला प्रशासन कार्यालय पर्साका एक कर्मचारीका अनुसार गाउँपालिका अध्यक्ष यादवले २५ हजार रुपैयाँ, प्रहरी निरीक्षक प्रदीप पौडेलले १८ हजार रुपैयाँ धरौटी बुझाएका छन् । त्यसैगरी क्यासिनोका कर्मचारी विजय कुमार पटेल, दिनेश कुमार पटेल र जयदेव साहले जनही २० हजार रुपैयाँ धरौटी बुझाएर रिहा भएका छन् ।
यस्तै, अध्यक्ष यादवसँगै पक्राउ परेका चन्दन सहनी र ओमप्रकाश बैठा तथा क्यासिनोका कर्मचारी एवं अभिनेता प्रदेशी साहले जनही १५ हजार रुपैयाँ धरौटी बुझाएर रिहा भएका हुन् ।
भदौ २० गते राति करिब १०ः३० बजे नेपाली नागरिकलाई क्यासिनोभित्र प्रवेश गराई जुवा खेलाइरहेको सूचना पाएपछि जिल्ला प्रहरी कार्यालय पर्साबाट खटिएको प्रहरी टोलीले क्यासिनोमा छापा मारेको थियो । सो क्रममा नेपालीलाई क्यासिनोमा प्रवेश गराई जुवा खेल्ने तथा खेलाउने कार्यमा संलग्न रहेको आरोपमा आठ जनालाई प्रहरीले नियन्त्रणमा लिएको थियो ।
पक्राउ परेका आठै जना ९ दिनपछि सोमबार धरौटी बुझाएर रिहा भएका हुन् । यसकाे अलावा थप एक जनामाथि पनि प्रहरीले मुद्दा दर्ता गरेकाे छ ।
