वीरगंज । असोज ११ गते वीरगंजमा हुने नेपाल कम्युनिष्ट पार्टी (नेकपा) पर्साको जिल्ला समायोजन, सपथ ग्रहण तथा प्रशिक्षण कार्यक्रमलाई भव्य र व्यवस्थित रूपमा सम्पन्न गर्न विभिन्न समिति तथा उपसमिति गठन गरिएको छ ।
नेकपा पर्साका जिल्ला पदाधिकारीहरूको बैठकले कार्यक्रम व्यवस्थापनका लागि २१७ सदस्यीय मूल व्यवस्थापन समिति सहित विभिन्न उपसमिति गठन गरेको हो ।
बैठकले जयप्रकाश थारुको संयोजकत्वमा केन्द्रीय सदस्य तथा प्रदेश सदस्यहरू रहने गरी २१७ सदस्यीय मूल व्यवस्थापन समिति गठन गरेको छ । त्यस्तै, थारुकै संयोजकत्वमा फिरोज बादसाह, सब्बा अन्सारी, रुपनारायण सिंह, जयशंकर यादव, अमिरीलाल कलवार, टुनटुन तिवारी, गजाधर पटेल र अनिल पटेल सदस्य रहेको आर्थिक उपसमिति गठन गरिएको छ ।
जिल्ला सह–संयोजक गंगा बहादुर खड्काको संयोजकत्वमा प्रतिनिधि व्यवस्थापन उपसमिति गठन गरिएको छ । सह–संयोजक फिरोज बादसाहको संयोजक तथा देवेन्द्र पटेल सह–संयोजक रहेको स्वयंसेवक उपसमिति, विजय प्रसाद महतो संयोजक तथा हिरा भट्टराई सह–संयोजक रहेको अतिथि सत्कार उपसमिति पनि गठन गरिएको छ ।
त्यसैगरी, किशोरी प्रसाद कुश्वाहाको संयोजकत्वमा प्रचार–प्रसार उपसमिति गठन गरिएको छ । उपसमितिमा प्रेस सेन्टर नेपालका मधेश प्रदेश अध्यक्ष निरज पिठाकोटे मगर, समाजवादी प्रेस संगठन नेपालका मधेश प्रदेश अध्यक्ष मनोज पटेल, प्रेस सेन्टरका पर्सा अध्यक्ष शिवनाथ यादव र समाजवादी प्रेस संगठन पर्साका अध्यक्ष शम्भु कुमार सुमन सदस्य रहेका छन् ।
कार्यक्रम असोज ११ गते वीरगंजकाे नगरसभा गृहमा आयोजना हुने नेकपा पर्साका संयोजक जयप्रकाश थारुले जानकारी दिए ।
कार्यक्रममा नेकपाका केन्द्रीय संयोजक पुष्पकमल दाहाल ‘प्रचण्ड’ र सह–संयोजक माधवकुमार नेपालको उपस्थिति रहने नेकपा पर्साका सह–इन्चार्ज मनोज चौधरीले बताए । उनका अनुसार कार्यक्रममा जिल्ला समायोजनसँगै सपथ ग्रहण तथा प्रशिक्षणसमेत आयोजना गरिनेछ ।
सोमबार नेकपा पर्साका संयोजक जयप्रकाश थारुको अध्यक्षतामा बसेको बैठकमा नेकपा मधेश प्रदेश सह–संयोजक क्षेत्रबहादुर श्रेष्ठ ‘अनिल’, पर्सा सह–इन्चार्ज मनोज चौधरी, केन्द्रीय सदस्य किशोरी कुश्वाहा, जिल्ला सह–संयोजकहरू गंगा बहादुर खड्का, फिरोज बादसाह लगायतको उपस्थिति रहेको थियो ।
