वीरगंज । बाराको कलैयामा १२ वर्षीया बालिकालाई अपहरण गरी करिब १० दिनसम्म बन्धक बनाएर पटक–पटक जबरजस्ती करणी गरेको कसुरमा १८ वर्ष कैद सजाय सुनाइएका फरार प्रतिवादी पक्राउ परेका छन् ।

पक्राउ पर्नेमा रौतहटको कटहरिया नगरपालिका–७ बगही घर भई हाल बाराको कलैया उपमहानगरपालिका–४ मा डेरा गरी बस्दै आएका २३ वर्षीय अफरोज अन्सारी रहेका छन् । उनलाई प्रहरीले बुधबार कलैया उपमहानगरपालिका–६ स्थित बजारबाट पक्राउ गरेको हो ।

जिल्ला प्रहरी कार्यालय बाराका अनुसार अन्सारीले २०७८ माघ १० गते १२ वर्षीया बालिकालाई ललाईफकाई तथा डरत्रास देखाएर अपहरण गरेका थिए । उनलाई कलैया उपमहानगरपालिका–४ स्थित मैदामिल पछाडिको झाडीमा लगेर पहिलोपटक जबरजस्ती करणी गरेको प्रहरी अनुसन्धानबाट खुलेको थियो ।

त्यसपछि अन्सारीले बालिकालाई बसमा चढाएर काठमाडौंको वनस्थली पुर्‍याई एउटा कोठामा राखेको र त्यहाँ समेत पटक–पटक जबरजस्ती करणी गरेको प्रहरीको विवरणमा उल्लेख छ । बालिकालाई करिब १० दिनसम्म बन्धक बनाएर राखिएको प्रहरीले जनाएको छ ।

पीडित बालिकाको परिवारले दिएको जाहेरीका आधारमा प्रहरीले घटनाको अनुसन्धान अघि बढाएको थियो । अनुसन्धानका क्रममा प्रहरीले २०७८ माघ २० गते बालिकाको उद्धार गरेको थियो । त्यसपछि अन्सारीविरुद्ध अपहरण, शरीर बन्धक तथा जबरजस्ती करणीसम्बन्धी मुद्दा दर्ता गरिएको थियो ।

मुद्दाको सुनुवाइपछि उच्च अदालत जनकपुरको अस्थायी इजलास वीरगन्जले २०८२ पुस २४ गते अन्सारीलाई १८ वर्ष कैद सजाय सुनाएको थियो । अदालतले उनलाई ६ लाख रुपैयाँ जरिवाना तथा पीडित राहत कोषमा २४ हजार रुपैयाँ जम्मा गर्नसमेत आदेश दिएको थियो ।

अदालतको फैसला कार्यान्वयनका क्रममा फरार रहेका अन्सारीलाई प्रहरीले पक्राउ गरी बुधबार बारा जिल्ला अदालत, कलैयामा पेस गरेको जनाएको छ । अदालतको आदेशअनुसार उनलाई वीरगन्ज कारागार पठाइएको प्रहरीले जनाएको छ ।

वीरगंज । जिल्ला प्रशासन कार्यालय  (जिप्रका) पर्साले जिल्लावासीलाई भारी वर्षामा सतर्क रहन अनुरोध गरेको छ ।

यही असोज ९ देखि असोज ११ गतेसम्म देशका विभिन्न स्थानमा मेघगर्जन/चट्याङ र हावाहुरीसहित भारी वर्षा हुने मौसम विज्ञान विभागको समाचारलाई ध्यानमा राख्दै जिल्लावासीलाई सचेत रहन अनुरोध गरिएको हो ।

जिप्रकाले आज सूचना जारी गरी उक्त अवधिमा जरुरी नभई यात्रा नगर्न र जिल्लामा रहेका साना तथा ठूला खोला नदीको तटीय क्षेत्रमा बसोबास नगर्न  अपिल गरेको छ ।

वर्षा र बाढीबारे जानकारी लिन ११५५ मा सम्पर्क गर्न, विपद्मा मद्दत माग्न १२३४, नेपाल प्रहरीको हटलाइन १०० र सशस्त्र प्रहरी बल, नेपालको हटलाइन नम्बर १११४ मा सम्पर्क गर्नुपर्नेमा जिप्रकाको जोड छ । जिप्रकाले भनेको छ, “नेपाल मौसम विज्ञान विभाग र प्राधिकरणबाट जारी हुने अध्यावधिक पूर्वानुमान/पूर्वसूचना/चेतावनीसम्बन्धी जानकारी लिइरहनुहुन पनि अनुरोध गर्दछौँ ।” सहायक प्रजिअले भन्नुभएको छ ।

बारा । बाराको कलैया उपमहानगरपालिकाले सामुदायिक तथा संस्थागत विद्यालयमा दुई दिन पठनपाठन बन्द गर्ने निर्णय गरेको छ।

उपमहानगरपालिकाका अनुसार असोज ८ गते बिहीबार र ९ गते शुक्रबार विद्यालयमा पठनपाठन बन्द रहनेछ। मौसम पूर्वानुमानअनुसार असोज ९, १० र ११ गते देशका विभिन्न स्थानमा भारीदेखि अति भारी वर्षा, उच्च पहाडी तथा हिमाली क्षेत्रमा हिमपात, हावाहुरी तथा चट्याङको सम्भावना रहेकाले विद्यालय बन्द गर्ने निर्णय गरिएको हो।

शिक्षा तथा खेलकुद मन्त्रालयले विद्यार्थी, बालबालिका, शिक्षक तथा कर्मचारीको सुरक्षालाई ध्यानमा राख्दै स्थानीय तहसँग समन्वय गरी आवश्यकताअनुसार विद्यालयमा बिदा दिन आग्रह गरेको थियो।

सोही आधारमा कलैया उपमहानगरपालिकाको शिक्षा शाखाले दुई दिन विद्यालय बन्द रहने जानकारी दिएको हो।

उपमहानगरपालिकाले अभिभावकलाई आफ्ना बालबालिकालाई नदी, खोला, पोखरी तथा पहिरोको जोखिम रहेका स्थानमा नजान दिन समेत आग्रह गरेको छ।

वीरगंज । प्राइम कमर्सियल बैंक लिमिटेडको २०औँ वार्षिकोत्सवको अवसरमा बैंकको वीरगञ्ज शाखाले रक्तदान कार्यक्रम आयोजना गरेको छ। कार्यक्रममा चार महिलासहित ७५ जनाले रक्तदान गरेका छन्।

रक्तदान कार्यक्रम तेरापन्थ युवक परिषद् वीरगञ्जको सहकार्य तथा सहयोगमा आयोजना गरिएको हो। परिषद्ले रक्त अभावका कारण बिरामी तथा उपचाररत व्यक्तिले समस्या भोग्न नपरोस् भन्ने उद्देश्यले विभिन्न संघसंस्था, व्यवसायिक प्रतिष्ठान तथा समुदायसँग सहकार्य गर्दै नियमित रूपमा रक्तदान कार्यक्रम सञ्चालन गर्दै आएको जनाएको छ।

कार्यक्रममा रिता साह, बुद्धिराज बराल, शालु सिंह, ऋषि राम भट्टराई, रणजीत आर्याल, दिलीप कुमार शाह, राजु कलवार, मनमोहन शर्मा, नितेश कुमार, विपिन आचार्य, अजय श्रेष्ठ, सन्दीप सर्राफ, दीपक सहानी, राहुल यादव, अंकित उप्रेती, रामबाबु प्रसाद कुर्मीलगायतले रक्तदान गरेका थिए।

कार्यक्रममा तेरापन्थ युवक परिषद् वीरगञ्जका अध्यक्ष सुनिल दुगड, नेपाल रेडक्रस सोसाइटी रेशमकोठी उपशाखाका सह–कोषाध्यक्ष अभिलाष गुप्ता, लालबाबु सिंह, समाजसेवी राजेन्द्र भट्टराईलगायत बैंकका कर्मचारीहरूको उपस्थिति थियो।
रक्तसञ्चार केन्द्र वीरगञ्जका प्रमुख सौरभराज पाण्डेको नेतृत्वमा आएको टोलीले रक्त सङ्कलन तथा आवश्यक स्वास्थ्यसम्बन्धी प्राविधिक व्यवस्थापनमा सहयोग गरेको थियो।

रक्तदान कार्यक्रममा बैंकका प्रादेशिक प्रमुख बुद्धिराज बराल र वीरगञ्ज शाखा प्रमुख ऋषि राम भट्टराईको विशेष उपस्थिति रहेको थियो।

वार्षिकोत्सवको अवसरमा आयोजित रक्तदान कार्यक्रमबाट संकलित रगतले वीरगञ्ज तथा आसपासका क्षेत्रमा उपचाररत बिरामीलाई आवश्यक परेको समयमा सहयोग पुग्ने आयोजकले अपेक्षा गरेको छ।

तेरापन्थ युवक परिषद्ले सामाजिक सेवाको अभियानलाई निरन्तरता दिँदै आगामी दिनमा पनि विभिन्न संघसंस्थासँगको सहकार्यमा रक्तदानलगायत सामाजिक गतिविधिलाई प्राथमिकता दिने जनाएको छ।

काठमाडौं । आम जनता पार्टी (आजपा)को उपत्यका विशेष कमिटी पुनर्गठन भएको छ । पासाङ तामाङको अध्यक्षतामा ८७ सदस्यीय कमिटी गठन भएको हो ।

कमिटीको उपाध्यक्षमा निरञ्जन पौडेल, देवकुमारी साह, शिवशंकर पटेल, वीरवल यादव, तेजनारायण चौधरी, सचिवमा रवि ध्वज कार्की, सहसचिवमा राजेश शर्मा, साहिल साह, लक्ष्मी मगर र कोषाध्यक्षमा मीनादेवी साह रहेका छन् ।

आजपा संगठन विभाग प्रमुख त्रिभुवन साहले जारी गरेको विज्ञप्ति अनुसार कमिटीको इन्चार्जमा तिलक थापा मगर, सहइन्चार्जमा धनकुमारी मगर, देवी पण्डित, रन्जू कुमारी साह, विजय यादव, उपेन्द्र साह रहेका छन् ।

कमिटीको सदस्यहरुमा रामशरण यादव, चन्द्रिकालाल साह, प्रेम थापा, अनिता थापा, इन्दल साह, सीमा जयसवाल, संजीता कुशवाहा, ई। प्रेम साह, रन्जित साह, श्रीकिसुन वैठा, उपेन्द्र रौनियार, सुरेश साह, सुनिल साह, दिपेन्द्र चौधरी, रामप्रवेश पटेल, संजय साह, प्रदीपजंग कार्की, मनीषा राई, सुस्मिता कार्की, प्रिया यादव, राजकुमार राम, राहुल साह, रामाशंकर साह, शम्भु जयसवाल, गोपाल जयसवाल, प्रमोद साह, अजय साह, गौरीप्रसाद जयसवाल लगायतका रहेका छन् ।

वीरगंज । जिल्ला प्रशासन कार्यालय पर्साले आगामी दिनमा भारी वर्षा तथा अति भारी वर्षाको सम्भावना रहेकाले जिल्लावासीलाई उच्च सतर्कता अपनाउन आग्रह गरेको छ।

कार्यालयले बुधबार जारी गरेको प्रेस विज्ञप्तिमा नेपाल मौसम विज्ञान विभागको विशेष मौसम बुलेटिनलाई उद्धृत गर्दै असोज ९ गते शुक्रबारदेखि असोज ११ गते आइतबारसम्म देशका केही स्थानमा मेघगर्जन र चट्याङसहित भारी वर्षा तथा एक–दुई स्थानमा अति भारी वर्षाको सम्भावना रहेको जनाएको छ।

वर्षाको प्रभावका कारण मधेशसहित कोशी, बागमती र गण्डकी प्रदेशका केही स्थानमा बुधबारदेखि नै मध्यम वर्षा हुन सक्ने प्रशासनले जनाएको छ। लगातारको भारी वर्षाका कारण खोला तथा नदी आसपासका बस्तीमा बाढीको जोखिम बढ्न सक्ने भएकाले विशेष सावधानी अपनाउन प्रशासनले आग्रह गरेको हो।

सहायक प्रमुख जिल्ला अधिकारी कृष्ण थापाले हस्ताक्षर गरेको विज्ञप्तिमा अत्यावश्यक कामबाहेक रातको समयमा यात्रा नगर्न सर्वसाधारणलाई अनुरोध गरिएको छ। साथै खोला तथा नदीको तटीय क्षेत्रमा बसोबास गर्ने नागरिकलाई उच्च सतर्कता अपनाउन र आकस्मिक बाढी आउन सक्ने खोला, खहरे तथा पहिरो जोखिमयुक्त क्षेत्रबाट टाढा रहन आग्रह गरिएको छ।
प्रशासनले सम्भावित विपद्का समयमा उद्धार तथा सहयोगका लागि राष्ट्रिय विपद् जोखिम न्यूनीकरण तथा व्यवस्थापन प्राधिकरणको ११४९, नेपाल प्रहरीको १०० र सशस्त्र प्रहरी बलको १११४ मा सम्पर्क गर्न अनुरोध गरेको छ।

यस्तै, वर्षा, बाढी तथा मौसमसम्बन्धी जोखिमबाट बच्न नेपाल मौसम विज्ञान विभागबाट जारी हुने अद्यावधिक मौसम पूर्वानुमान, पूर्वसूचना तथा चेतावनीसम्बन्धी जानकारी नियमित रूपमा लिन पनि जिल्ला प्रशासन कार्यालय पर्साले सर्वसाधारणलाई आग्रह गरेको छ।