वीरगंज । पर्सा निर्वाचन क्षेत्र नम्बर–३ बाट नेकपा (एमाले) का प्रतिनिधिसभा सदस्य उम्मेदवार रुपेश पाण्डे जनताको स्पष्ट एजेन्डा, सुशासनप्रतिको दृढ अडान र विकासको ठोस खाकासहित चुनावी मैदानमा उत्रिएका छन्। “सुशासन र विकास, एमालेको पहिचान” भन्ने नारा अब केवल नारा नभई जनअपेक्षाको प्रतिबिम्ब बन्न थालेको छ।
लामो समयदेखि अस्थिरता, अवसरवाद र खोक्रा भाषणबाट आजित मतदाता अब परिणाम चाहन्छन्। यही चाहनालाई बुझेर एमालेले पर्सा–३ बाट रुपेश पाण्डेजस्ता स्पष्ट दृष्टिकोण, स्वच्छ छवि र संगठनात्मक क्षमतावाला उम्मेदवार प्रस्तुत गरेको छ।
पाण्डेले चुनावी अभियानका क्रममा भ्रष्टाचारविरुद्ध शून्य सहनशीलता, स्थानीय विकास प्राथमिकता, युवा रोजगारी, पूर्वाधार विस्तार र जनताको दैनिक समस्यामा प्रत्यक्ष हस्तक्षेप गर्ने प्रतिबद्धता दोहोर्याएका छन्। उनका कार्यक्रमहरूमा देखिएको जनसहभागिता र उत्साहले पर्सा–३ मा एमालेप्रति विश्वास बलियो बन्दै गएको संकेत दिएको छ।
राजनीति सत्ता र सौदाबाजीको माध्यम नभई सेवा र जिम्मेवारीको माध्यम हुनुपर्छ भन्ने मान्यतालाई व्यवहारमा उतार्न सक्ने उम्मेदवारको खोजीमा रहेका मतदाताका लागि रुपेश पाण्डे आज विश्वसनीय विकल्प बनेका छन्।
पर्सा–३ मा पाण्डेको पक्षमा जनसमर्थन सुनामीझैँ बढ्दै गएको छ। निरन्तर चलिरहेको घरदैलो कार्यक्रम र मतदाता भेटघाटले पाण्डेलाई जनताको घर–घरमा मात्र नभई मन–मनमा पनि स्थापित गरिसकेको छ। गाउँ, टोल र बस्तीमा पुगेका मतदाताले एउटै कुरा स्पष्ट रूपमा भन्न थालेका छन्—पर्सा–३ मा रुपेश पाण्डेको विकल्प छैन।
यस यथार्थले बिपक्षीहरू आत्तिएका छन् र षड्यन्त्रमा लागेका छन्। तर, एमाले उम्मेदवार पाण्डेविरुद्ध रचिएका हरेक षड्यन्त्र जनताकै विवेकले असफल बनेको देखिन्छ। समग्रमा, पर्सा–३ मा रुपेश पाण्डे सुशासन र विकासको बलियो विकल्पका रूपमा स्थापित हुँदै गएका छन्।
