वीरगंज । पर्सा निर्वाचन क्षेत्र नम्बर ४ का नेपाली कांग्रेसका प्रतिनिधिसभा सदस्य उम्मेदवार रमेश रिजालप्रति मुस्लिम समुदायको आकर्षण र जनसमर्थन बढ्दै गएको देखिएको छ। घरदैलो अभियानका क्रममा मुस्लिम समुदायले उम्मेदवार रिजाललाई आत्मीय स्वागत गर्दै समर्थन जनाइरहेका छन्।
मुस्लिम समुदायको उल्लेख्य बसोबास रहेको जगरनाथपुर गाउँपालिकाका वडा नम्बर १ र २ अन्तर्गत पर्ने पाँडेपुर र पिडारीमा आयोजित घरदैलो कार्यक्रममा स्थानीय मुस्लिम समुदायले उम्मेदवार रिजाललाई स्वागत गर्दै आगामी निर्वाचनमा साथ दिने प्रतिबद्धता व्यक्त गरेका छन्।
त्यस्तै पर्सा–४ का अन्य विभिन्न स्थानमा पनि मुस्लिम समुदायका मतदाताहरूले उम्मेदवार रिजालप्रति सकारात्मक धारणा व्यक्त गरेको देखिएको छ । पूर्व मन्त्री तथा निर्वतमान सांसदसमेत रहेका रिजालको सरल स्वभाव, मिलनसार व्यक्तित्व र जनतासँगको निकटताले सबै समुदायमा भरोसा बढाएको स्थानीयको भनाइ छ।
स्थानीय मुस्लिम समुदायका अगुवाहरूका अनुसार उम्मेदवार रिजाल जनताको समस्या बुझ्ने, सबै समुदायलाई समान सम्मान गर्ने र समावेशी विकासको पक्षमा उभिने नेता भएकाले उनीप्रति विश्वास बढ्दै गएको हो। “उहाँले सधैं सबै समुदायलाई बराबरी रूपमा हेर्नुहुन्छ,” एक स्थानीय अगुवाले भने, “त्यसैले हाम्रो समर्थन स्वाभाविक हो।”
घरदैलो तथा जनसम्पर्क कार्यक्रममार्फत रमेश रिजालले शिक्षा, स्वास्थ्य, रोजगारी, पूर्वाधार विकास र सामाजिक सद्भावलाई प्राथमिकतामा राखेर अघि बढ्ने प्रतिबद्धता जनाउँदै आएका छन्। विभिन्न समुदायको सक्रिय सहभागिताले पर्सा–४ मा उनको चुनावी अभियान थप बलियो बन्दै गएको देखिन्छ।
पर्सा–४ मा रमेश रिजालप्रति मुस्लिम समुदायसहित विभिन्न वर्ग र समुदायको बढ्दो समर्थनले आगामी निर्वाचनको माहोललाई थप रोचक र प्रतिस्पर्धात्मक बनाएको छ।
