सेढवा । पर्साको जगरनाथपुर गाउँपालिकामा एनवास एप्समार्फत तथ्याङ्क संकलन सम्बन्धी दुई दिने तालिम आज सम्पन्न भएको छ।
पालिका स्तरीय खानेपानी, सरसफाइ तथा स्वच्छता (WASH) योजना अध्यावधिक गर्ने उद्देश्यले शिक्षक तथा स्वास्थ्य संस्थाका कर्मचारीहरूका लागि उक्त तालिम आयोजना गरिएको हो।
कृषि तथा पशुपन्छी विकास केन्द्र मसियानीको सभाहलमा सम्पन्न तालिममा विद्यालय तथा स्वास्थ्य संस्थाहरूमा रहेको खानेपानी, सरसफाइ तथा स्वच्छताको अवस्थाबारे अनलाइन माध्यमबाट संघीय, प्रदेश तथा स्थानीय तहमा तथ्याङ्क पठाउने सरकारी नीति रहेको जानकारी गराइएको थियो।
उक्त तथ्याङ्कका आधारमा सरकारले आवश्यक योजना तर्जुमा तथा कार्यान्वयन गर्ने जनाइएको छ।
तालिमको सहजीकरण छायाँ नेपालले गरेको थियो। कार्यक्रममा पालिकाभरिका ३३ वटा सामुदायिक विद्यालयका प्रधानाध्यापक, फोकल शिक्षक तथा स्वास्थ्य संस्थाका प्रतिनिधिहरूको सहभागिता रहेको थियो।
कार्यक्रममा होमनाथ आचार्य र दीपक रोकायाले प्रशिक्षण दिनुभएको थियो।
