सेढवा । छिमेकी भारत को बिहारस्थित ऐतिहासिक आदिशक्ति सहोदरा माई मन्दिरमा नेपाली दहित परिवारले बलि चढाएसँगै विधिवत रूपमा मेला सुरु भएको छ।
पश्चिमी चम्पारण जिल्लाको गौनाहा प्रखण्ड अन्तर्गत जमुनिया पञ्चायतमा रहेको उक्त मन्दिरमा आजदेखि दश दिनसम्म मेला सञ्चालन हुने भएको हो। देवाढ गाउँमा अवस्थित यस मन्दिरमा प्रत्येक वर्ष राम नवमी (चैत नवमी) को अवसरमा मेला लाग्ने परम्परा रहिआएको छ।
विशेषतः मेलाको सुरुवात नेपाली दहित परिवारद्वारा पहिलो पूजा तथा बलि चढाएर गर्ने प्रचलन रहेको छ। पहिलो पूजा तथा बलि चढाउने जिम्मा पर्साको पटेर्वासुगौली गाउँपालिका वडा नं. ५ देउरियास्थित दहित परिवारमा रहेको सो परिवारका महादेव दहितले जानकारी दिएका छन्।
उनका अनुसार जेष्ठताका आधारमा जयनारायण दहित, शिव दहित र शंकर दहितले क्रमशः पूजा तथा बलि चढाउने परम्परा कायम छ। परिवारका सदस्यहरू शनिबार नै मन्दिर पुगेर पूजाआजा तयारी पूरा गरी आज बलिदान गरेपछि सर्वसाधारणका लागि पूजा तथा बलि चढाउने कार्य खुला गरिएको उनले बताए।
आज बिहानदेखि भक्तजनहरूले माताको भाकल अनुसार बोका, हाँस, कुखुरा लगायतका जीवहरूको बलि चढाएका छन्।
ऐतिहासिक रूपमा यो मन्दिर आदिवासी थारु समुदायको प्राचीन संस्कृतिसँग जोडिएको मानिन्छ। यस कारण मन्दिरमा परम्परागत रूपमा थारु पुजारी रहने चलन रहेको जमुनियाका स्थानीय अमित कुमार चौधरीले बताएका छन्।
मन्दिरमा दर्शनका लागि भारतसँगै नेपाल का पर्सा, बारा, रौतहट तथा चितवन जिल्लाबाट हजारौँ भक्तजनहरूको भीड लाग्ने गरेको पनि उनले जानकारी दिएका छन्।
