वीरगंज । सगरमाथा एकेडेमीले कक्षा १० मा अध्ययनरत विद्यार्थीहरूलाई एक विशेष कार्यक्रमका बीच विदाई गरेको छ। विद्यालयको सभाहलमा आयोजित कार्यक्रममा विद्यार्थीहरूलाई सम्मान गर्दै औपचारिक रूपमा बिदाई गरिएको हो।
विद्यालय जीवनको महत्वपूर्ण चरण पूरा गरी उच्च शिक्षातर्फ अघि बढ्न लागेका विद्यार्थीहरूका लागि आयोजित उक्त कार्यक्रममा भावुक र उत्साहपूर्ण वातावरण देखिएको थियो। कार्यक्रममा विद्यार्थीहरूको योगदान, अनुशासन र उपलब्धिहरूको चर्चा गर्दै उनीहरूको उज्ज्वल भविष्यको कामना गरिएको थियो।
कार्यक्रम विद्यालयका संस्थापक तथा प्रिन्सिपल जियालाल गुप्ताको अध्यक्षतामा सम्पन्न भएको थियो भने नेशनल प्याब्सनका केन्द्रीय वरिष्ठ उपाध्यक्ष रामविनय चौरसियाले उद्घाटन गरेका थिए।
कार्यक्रमलाई सम्बोधन गर्दै उपाध्यक्ष चौरसियाले विद्यार्थीहरूलाई लक्ष्यप्रति प्रतिबद्ध रहन र निरन्तर प्रयास गर्न सुझाव दिँदै आगामी यात्राका लागि शुभकामना व्यक्त गरे।
प्रिन्सिपल गुप्ताले विद्यार्थीहरूलाई अनुशासन, समयको सदुपयोग र निरन्तर मेहनतमार्फत जीवनमा सफल बन्न प्रेरित गरे। उनले विद्यालयले दिएको शिक्षा र संस्कारलाई व्यवहारमा उतार्दै जिम्मेवार नागरिक बन्न आग्रह गर्दै भने, “विद्यालयबाट प्राप्त मूल्य र अनुशासन नै भविष्यको सफलताको मुख्य आधार हो।”
कार्यक्रममा विभिन्न विद्यालयका प्रतिनिधि तथा शिक्षासेवीहरूको उपस्थिति रहेको थियो। कार्यक्रममा गूगल एकेडेमीका संस्थापक नरेश पटेल, गोल्डेन गेट स्कूलका शेख अजहर, शुभ तारा स्कूलका प्रमोद साह, अध्ययन स्कूलका गौतम श्रीवास्तव, ए–प्लस स्कूलका देव जैसवाल, नवयुग स्कूलका आनन्द पटेल, ममता विद्या मन्दिरका विश्वास शाह तथा ज्ञान उदय स्कूलका पतिराम शाहलगायतको सहभागिता रहेको थियो।
कार्यक्रममा कक्षा १० का सम्पूर्ण विद्यार्थीहरूलाई मायाको चिन्हो प्रदान गरिएको थियो। शिक्षक र विद्यार्थीबीचका सम्झनाहरू साटासाट गर्दै कार्यक्रम भावनात्मक बनेको थियो भने केही विद्यार्थीहरूले आफ्ना अनुभव सुनाउँदै शिक्षक तथा अभिभावकप्रति आभार व्यक्त गरेका थिए।
यसैगरी, विद्यार्थीहरूले नृत्य, गीत तथा हास्य प्रस्तुति प्रस्तुत गर्दै आफ्नो प्रतिभा प्रदर्शन गरेका थिए, जसले कार्यक्रमलाई थप आकर्षक बनाएको थियो।
