वीरगंज । वीरगंज कारागारबाट बिहीबार बिहान एक जना कैदी फरार भएका छन् । फरार हुनेमा पर्साको पोखरिया नगरपालिका–४, सतरियाका ३० वर्षीय सुनिल साह तुरहा रहेका छन् ।
कारागारमा कैद भुक्तान गरिरहेका साह बिहीबार बिहान ८ः४० बजे फरार भएको प्रहरीले जनाएको छ ।
पर्साका प्रमुख जिल्ला अधिकारी भोला दाहालले पनि कैदी फरार भएको पुष्टि गरेका छन् । उनका अनुसार बिहान ८ः४० बजे एक जना कैदी फरार भएको सूचना प्राप्त भएको हो ।
‘बिहान ८ः४० बजे एक जना कैदी फरार भएको खबर आएको छ,’ प्रमुख जिल्ला अधिकारी दाहालले भने, ‘उनी कसरी फरार भए भन्नेबारे खोजी तथा अनुसन्धान भइरहेको छ ।’
कैदी फरार हुनुको कारण र घटनाको वास्तविक अवस्थाबारे प्रहरीले अनुसन्धान गरिरहेको छ ।
