चितवन । चितवनको भरतपुर महानगरपालिका–४ त्रिचोकमा श्रीमानको कुटपिटबाट श्रीमतीको मृत्यु भएको छ।
बुधबार बिहान करिब ८ः३० बजे घरायसी विवादका क्रममा ३० वर्षीय सुमन राना मगरले आफ्नी ३२ वर्षीया श्रीमती सपना राना मगरमाथि कुटपिट गरेका थिए। कुटपिटबाट सपनाको घटनास्थलमै मृत्यु भएको जिल्ला प्रहरी कार्यालय चितवनले जनाएको छ।
प्रहरीका अनुसार श्रीमान्–श्रीमती दुवै स्याङ्जाको चापाकोट गाउँपालिका–६ का स्थायी बासिन्दा हुन्। उनीहरू भरतपुर महानगरपालिका–४ त्रिचोकस्थित रामजी ढकालको घरमा डेरा गरी बस्दै आएका थिए।
घटनापछि प्रहरीले कुटपिटमा संलग्न सुमन राना मगरलाई नियन्त्रणमा लिएको छ। घटनाको कारण र परिस्थितिबारे थप अनुसन्धान भइरहेको जिल्ला प्रहरी कार्यालय चितवनले जनाएको छ।
