वीरगंज । पर्सा जिल्ला अदालतमा संस्थागत विकास, भौतिक पूर्वाधार सुधार तथा सेवाग्राहीमैत्री न्याय प्रशासनलाई प्राथमिकता दिँदै विभिन्न सुधारका कामहरू अघि बढाइएको छ ।
अदालतका रजिस्ट्रार तथा श्रेस्तेदार प्रभाकर कुमार मल्लिकको पहल र समन्वयमा सेवाग्राहीलाई सहज, सरल र सुविधायुक्त वातावरणमा न्यायिक सेवा उपलब्ध गराउने उद्देश्यले विभिन्न संरचनागत तथा व्यवस्थापकीय सुधार गरिएको हो ।
अदालतमा न्यायको मूर्ति स्थापना, महिला तथा पुरुष सेवाग्राहीका लागि छुट्टाछुट्टै शौचालय निर्माण तथा न्यायाधीशको च्याम्बरमा शौचालयको व्यवस्था गरिएको छ । त्यसैगरी, सेवाग्राही महिलाको सुविधालाई ध्यानमा राख्दै स्तनपान कक्षसमेत स्थापना गरिएको छ ।
भौतिक पूर्वाधार सुधारअन्तर्गत सबै इजलासमा एसी जडान गरिएको छ भने अदालत भवनको रंगरोगन तथा सौन्दर्यीकरण गरिएको छ । अदालत परिसरमा रहेको खाली स्थानलाई उपयोग गर्दै कम्प्युटर अपरेटर कक्षको व्यवस्था गरिएको छ ।
त्यस्तै, अदालतमा जफत भएका दुईवटा सवारीसाधन कार्यालयकै नाममा दर्ता गराउने प्रक्रिया अघि बढाइएको छ । अदालतको भौतिक पूर्वाधार थप व्यवस्थित बनाउन एक कठ्ठा जग्गा प्राप्तिसम्बन्धी कार्यसमेत अघि बढाइएको अदालतका रजिस्ट्रार तथा श्रेस्तेदार मल्लिकले जानकारी दिए ।
यी सुधारका कामले अदालतमा आउने सेवाग्राही, न्यायाधीश तथा कर्मचारीलाई सहज वातावरण उपलब्ध गराउनुका साथै न्यायिक सेवा प्रवाहलाई थप व्यवस्थित बनाउन सहयोग पुग्ने अपेक्षा गरिएको छ ।
न्यायाधीश, कर्मचारी तथा कानुन व्यवसायीहरूसँग समन्वय र सहकार्य गर्दै मुस्कानसहितको न्याय सेवा, संस्थागत विकास र सेवाग्राहीको सन्तुष्टिलाई प्राथमिकतामा राखेर काम गरिरहेको श्रेस्तेदार मल्लिकले जनाएका छन् ।
