वीरगंज । जिल्ला हुलाक कार्यालय बाराले नेपाल टेलिकमको सिमकार्ड सेवाग्राहीको घरमै पुर्याउने सेवा सुरु गरेको छ । हुलाक सेवा विभाग र नेपाल टेलिकमबीच भएको सम्झौताअनुसार कार्यालयले बिहीबारदेखि जिल्लामा सिमकार्ड वितरण सेवा सुरु गरेको हो ।
हुलाक सेवामार्फत सेवाग्राहीलाई घरदैलोमै सेवा पुर्याउने उद्देश्यले नेपाल टेलिकमको सिमकार्ड वितरण सुरु गरिएको जिल्ला हुलाक कार्यालय बाराका हुलाक अधिकृत दीपक पटेलले जानकारी दिए ।
सेवा सुरु भएसँगै सिम्रौनगढ नगरपालिका–१ निवासी नेहा कुमारी ठाकुरलाई हुलाक सेवामार्फत नेपाल टेलिकमको सिमकार्ड हस्तान्तरण गरिएको छ ।
हुलाक सेवा विभाग र नेपाल टेलिकमबीचको सहकार्यले सर्वसाधारणलाई सहज, सरल र सुलभ रूपमा सेवा उपलब्ध गराउन सहयोग पुग्ने अपेक्षा गरिएको अधिकृत पटेलले बताए ।
उनका अनुसार यस व्यवस्थाअन्तर्गत नेपाल टेलिकमका सिमकार्ड वितरण गर्नुका साथै राहदानी, शैक्षिक प्रमाणपत्र तथा अन्य महत्त्वपूर्ण कागजात र सामग्रीसमेत हुलाक सेवामार्फत सम्बन्धित सेवाग्राहीको घरदैलोसम्म पुर्याउन सकिनेछ ।
यस सेवाले सेवाग्राहीको समय र खर्च बचत गर्नुका साथै सार्वजनिक सेवालाई थप नागरिकमैत्री, प्रभावकारी र पहुँचयोग्य बनाउन सहयोग पुग्ने विश्वास लिइएको छ ।
