वीरगञ्ज । जिल्ला प्रहरी कार्यालय पर्साले अवैध रूपमा भित्र्याइएका सात लाख रुपैयाँ बराबरका पटाका तथा विस्फोटक पदार्थ नष्ट गरेको छ।
प्रहरीले बुधबार कार्यालय परिसरमा खाल्डो खनी पानी र माटोले पुरेर विभिन्न प्रकारका पटाका, आतिशबाजी तथा विस्फोटक पदार्थ नष्ट गरेको हो।
जिल्ला प्रहरी कार्यालय पर्साका प्रवक्ता एवं सूचना अधिकारी प्रहरी नायब उपरीक्षक चक्रबहादुर मल्लका अनुसार जिल्ला प्रहरी कार्यालय तथा मातहतका प्रहरी इकाइहरूले चेकजाँचका क्रममा बरामद गरेका पटाका नष्ट गरिएको हो।
भारतबाट अवैध रूपमा भित्र्याइएका पटाका तथा अन्य विस्फोटक पदार्थ नियन्त्रणमा लिएर प्रहरी अधिकारी, स्थानीय प्रशासनका प्रतिनिधि र सञ्चारकर्मीको रोहबरमा नष्ट गरिएको मल्लले जानकारी दिए।
चाडपर्वका बेला पटाका तथा विस्फोटक पदार्थको अवैध ओसारपसार र प्रयोगले दुर्घटनाको जोखिम बढाउने भएकाले प्रहरीले यस्ता गतिविधिमाथि निगरानी तथा नियन्त्रण अभियान सञ्चालन गर्दै आएको छ।
