वीरगंज । पर्सामा बसपार्कबाट छुट्ने दिवा सेवाका सवारीसाधन दिउँसो २ बजेभित्रै काउन्टरबाट प्रस्थान गर्नुपर्ने निर्णय आजदेखि कार्यान्वयनमा आएको छ ।
यात्रुहरूको सुरक्षा सुनिश्चित गर्नुका साथै रातिको समयमा हुन सक्ने सवारी दुर्घटनाको जोखिम न्यूनीकरण गर्ने उद्देश्यले स्थानीय प्रशासन र जिल्ला ट्राफिक प्रहरी कार्यालय पर्साले उक्त निर्णय कार्यान्वयनमा ल्याएका हुन् ।
निर्णयअनुसार दिवा सेवाका सवारीसाधन निर्धारित समयभित्रै प्रस्थान गर्नुपर्नेछ। रातिको समयमा लामो दूरीको यात्रा गर्नुपर्ने यात्रुहरूलाई रात्रि बस सेवामार्फत यात्रा गर्न यातायात व्यवस्था कार्यालय, ट्राफिक प्रहरी कार्यालय पर्सा तथा यातायात व्यवसायीहरूले आग्रह गरेका छन् ।
२०८३ साल वैशाख २४ गते बिहीबार प्रमुख जिल्ला अधिकारी भोला दाहालको अध्यक्षतामा बसेको जिल्लामा सवारी आवागमन तथा यात्रु सुरक्षासम्बन्धी बैठकले गरेको निर्णयलाई प्रभावकारी रूपमा कार्यान्वयन गर्न सम्बन्धित निकाय, यातायात व्यवसायी तथा यात्रुहरूलाई अनुरोध गरिएको छ ।
निर्णय कार्यान्वयनमा आएपछि बस व्यवसायीहरू जगन्नाथ साह, अफताब आलम र सन्तोष साहलगायतले यसको स्वागत गरेका छन्। उनीहरूले यात्रु सुरक्षालाई प्राथमिकता दिँदै गरिएको व्यवस्थाले सुरक्षित यातायात सञ्चालनमा सहयोग पुग्ने विश्वास व्यक्त गरेका छन्। यात्रुहरूले पनि निर्णयप्रति सकारात्मक प्रतिक्रिया जनाएका छन् ।
दिवा सेवाका सवारीसाधन निर्धारित समयभित्रै प्रस्थान गर्ने व्यवस्था प्रभावकारी बनेमा यात्रुहरूलाई सुरक्षित रूपमा गन्तव्यसम्म पुग्न सहज हुने र रातिको समयमा हुन सक्ने दुर्घटनाको जोखिम न्यूनीकरणमा सहयोग पुग्ने अपेक्षा गरिएको छ ।
निर्णयको प्रभावकारी कार्यान्वयनका लागि बसपार्क तथा सवारीसाधन प्रस्थान हुने स्थानमा निगरानी बढाउनुपर्ने आवश्यकता पनि औँल्याइएको छ। साथै, यात्रुहरूलाई यात्रा गर्नुअघि सम्बन्धित काउन्टरबाट सवारी छुट्ने समयबारे जानकारी लिन आग्रह गरिएको छ ।
