जनकपुरधाम । राष्ट्रिय स्वतन्त्र पार्टी (रास्वपा) धनुषाका सभापति लक्ष्मेश्वर यादव र जिल्ला प्रहरी कार्यालय धनुषाका प्रमुख प्रहरी उपरीक्षक (एसपी) रुपेश खड्काबीच छोरीको कोर्ट म्यारिज प्रकरणलाई लिएर विवाद देखिएको छ।
धनुषाको हंसपुर नगरपालिका–८ निवासी यादवले परिवारकी एक महिला सदस्य हराएको भन्दै प्रहरीमा खोजतलासका लागि निवेदन दिएका थिए। तर, अनुसन्धानका क्रममा ती महिलाले काठमाडौं जिल्ला अदालतबाट विवाहको नाता कायम गराइसकेको खुलेको प्रहरीले जनाएको छ।
प्रहरीका अनुसार २७ वर्षीया महिलाले २३ वर्षीय युवकसँग आफ्नै इच्छाले विवाह गरेको बताएकी थिइन्। उनले आफ्नो विवाहसम्बन्धी प्रमाणसमेत प्रस्तुत गरेको प्रहरीले जनाएको छ।
यसै घटनालाई लिएर यादवले सार्वजनिक कार्यक्रममा प्रहरी प्रशासनविरुद्ध अपमानजनक तथा आधारहीन टिप्पणी गरेको भन्दै एसपी खड्काले आपत्ति जनाएका छन्।
एसपी खड्काले प्रेस विज्ञप्ति जारी गर्दै आफूमाथि लगाइएका आरोप प्रमाणित गर्न चुनौती दिएका छन्। उनले सामाजिक सञ्जालमा अपुष्ट तथा भ्रामक सामग्री फैलाएर प्रहरी संगठनको प्रतिष्ठामा आँच नपुर्याउनसमेत आग्रह गरेका छन्।
प्रहरीले घटनालाई तथ्य र प्रमाणका आधारमा बुझ्न आग्रह गर्दै विवाहसम्बन्धी विषयमा सम्बन्धित व्यक्तिको इच्छा र उपलब्ध प्रमाणलाई आधार मान्नुपर्ने जनाएको छ।
यद्यपि, प्रहरीको पछिल्लो विज्ञप्तिप्रति रास्वपा धनुषाका सभापति यादवको प्रतिक्रिया सार्वजनिक भइसकेको छैन।
