वीरगंज । नेपाली कांग्रेसको १५औँ महाधिवेशनमा पर्साका नेता अजयकुमार चौरसिया मधेसीतर्फको सहमहामन्त्री पदमा निर्वाचित भएका छन् । निकटतम प्रतिस्पर्धी महेन्द्र यादवलाई २३४ मतले पराजित गर्दै चौरसियाले पार्टीको केन्द्रीय पदाधिकारीमा स्थान बनाएका हुन् ।
चौरसिया सहमहामन्त्रीमा निर्वाचित भएसँगै नेपाली कांग्रेसको केन्द्रीय पदाधिकारी तहमा पुग्ने पर्साका पहिलो नेता बनेका छन् । उनको विजयलाई पर्साको कांग्रेस राजनीतिमा ऐतिहासिक उपलब्धिका रूपमा हेरिएको छ ।
पर्साबाट यसअघि कांग्रेसका नेताहरू केन्द्रीय सदस्यलगायत विभिन्न जिम्मेवारीमा पुगे पनि पदाधिकारी तहमा प्रतिनिधित्व हुन सकेको थिएन । चौरसियाको जितले जिल्लाको राजनीतिक उपस्थिति केन्द्रीय नेतृत्वमा स्थापित गरेको छ ।
मधेसीतर्फको सहमहामन्त्री पदमा महेन्द्र यादवजस्ता स्थापित नेतासँग प्रतिस्पर्धा गरेर हासिल गरेको सफलताले चौरसियाको पार्टीभित्रको राजनीतिक प्रभावसमेत उजागर गरेको छ । उनको विजयलाई पर्साको संगठनात्मक शक्ति र नेतृत्व क्षमताको उपलब्धिका रूपमा समेत विश्लेषण गरिएको छ ।
कांग्रेसको मधेसकेन्द्रित राजनीतिमा लामो समयदेखि जनकपुर क्षेत्रका नेताहरूको प्रभाव रहेको चर्चा हुँदै आएको छ । यस्तो अवस्थामा पर्साबाट चौरसियाले केन्द्रीय पदाधिकारीमा स्थान बनाउनुलाई मधेसभित्र पार्टीको नेतृत्व र शक्ति सन्तुलनमा आएको परिवर्तनका रूपमा हेरिएको छ ।
चौरसियाको विजयले मधेसमा कांग्रेसको संगठनात्मक प्रभाव, क्षेत्रगत प्रतिनिधित्व र नेतृत्वको भूगोलबारे नयाँ बहस सिर्जना गर्ने देखिएको छ । साथै, यसले पर्साको कांग्रेस राजनीतिलाई राष्ट्रिय स्तरमा थप चर्चामा ल्याएको छ ।
