वीरगंज । कार्बन लाभ बाँडफाँट तथा लगानी योजना तयारीसम्बन्धी एकदिने तालिम सोमबार वीरगंजमा सम्पन्न भएको छ । सामुदायिक वन उपभोक्ता तथा सम्बन्धित सरोकारवालालाई कार्बन लाभको बाँडफाँट, लगानी योजना निर्माण तथा वन व्यवस्थापनसँग जोडिएका विषयमा जानकारी गराउने उद्देश्यले तालिम आयोजना गरिएको हो ।
‘वनको दिगो व्यवस्थापन र सामुदायिक अधिकारः समावेशी, सुशासन र हरित अर्थतन्त्र समृद्धिको आधार’ भन्ने नारासहित जिल्ला समन्वय समिति पर्साको सभाहलमा तालिम सञ्चालन गरिएको थियो ।
सामुदायिक वन उपभोक्ता महासंघ, नेपाल जिल्ला महासंघ, पर्साको आयोजनामा भएको तालिममा प्रशिक्षक निरञ्जन हुमागाईंले सहभागीलाई कार्बन लाभको अवधारणा, लाभ बाँडफाँटको प्रक्रिया, लगानी योजना निर्माण तथा सामुदायिक वनको दिगो व्यवस्थापनसँग सम्बन्धित विषयमा प्रशिक्षण दिएका थिए ।
तालिमको अध्यक्षता सामुदायिक वन उपभोक्ता महासंघ, नेपाल जिल्ला महासंघ, पर्साका अध्यक्ष एकवाली प्रसाद यादवले गरेका थिए । कार्यक्रममा सामुदायिक वन उपभोक्ता महासंघ, नेपाल मधेश प्रदेशका अध्यक्ष सोम प्रसाद शर्मा, महासंघका केन्द्रीय सदस्य जयप्रकाश थारु, उषा थरुनी, जिल्ला समन्वय समिति पर्साकी सदस्य श्रीकान्ती देवीलगायतको उपस्थिति रहेको थियो ।
कार्यक्रममा वन संरक्षण तथा व्यवस्थापनमा स्थानीय समुदायको भूमिका, कार्बन सञ्चितिबाट प्राप्त हुने लाभलाई पारदर्शी र न्यायोचित ढंगले वितरण गर्ने विषय तथा प्राप्त लाभलाई समुदायको आवश्यकता र प्राथमिकताका क्षेत्रमा लगानी गर्नुपर्नेमा जोड दिइएको थियो ।
सहभागीहरूले कार्बन लाभसम्बन्धी नीतिगत व्यवस्था, लाभ बाँडफाँटको प्रक्रिया र लगानी योजना तयार गर्ने विषयमा जानकारी प्राप्त गरेको आयोजकले जनाएको छ । तालिमले सामुदायिक वन उपभोक्ता समूहलाई वनको दिगो व्यवस्थापनसँगै कार्बन लाभबाट प्राप्त अवसरलाई समुदायको हितमा उपयोग गर्न थप सहयोग पुग्ने अपेक्षा गरिएको छ ।
