काठमाडौं । आम जनता पार्टी (आजपा)ले मुलुकमा देखिएको राजनीतिक संकटको निकासका लागि अन्तरिम संविधानसहित अन्तरिम सरकार गठनको पहल गर्ने निर्णय गरेको छ । पार्टी अध्यक्ष एवं पूर्वमन्त्री प्रभु साहको अध्यक्षतामा सम्पन्न केन्द्रीय कमिटीको पूर्ण बैठकले जनआन्दोलनलाई नयाँ चरणमा अघि बढाउने तथा पार्टीको संगठनात्मक संरचना पुनर्गठन गर्ने निर्णयसमेत गरेको हो ।
बैठकले अध्यक्ष साहद्वारा प्रस्तुत ‘फेक शासनको भण्डाफोर गरौँ, जनआन्दोलनको दिशामा अघि बढौँ’ भन्ने मूल नारासहितको १८ पृष्ठ लामो राजनीतिक प्रतिवेदन सर्वसम्मतिले पारित गरेको आजपा प्रवक्ता सुभाष प्रसाद साहले जारी गरेको विज्ञप्तिमा उल्लेख छ ।
प्रतिवेदनमा वर्तमान राजनीतिक अवस्थाको समीक्षा गर्दै गलत संवैधानिक व्यवस्था र कमजोर नेतृत्वका कारण राष्ट्रिय स्वाधीनता, अर्थतन्त्र तथा लोकतन्त्र संकटमा पर्दै गएको निष्कर्ष निकालिएको छ । यस्तो अवस्थामा देशलाई निकास दिन ‘सिस्टम सुधार’ आवश्यक रहेको भन्दै पार्टीले अन्तरिम संविधानसहित अन्तरिम सरकारको मागलाई अघि बढाउने निर्णय गरेको हो ।
आजपाले यसअघि उठाउँदै आएको जनसंघर्ष तथा तेस्रो जनआन्दोलनका मुद्दालाई थप सशक्त र प्रभावकारी बनाउने निर्णयसमेत गरेको छ ।
केन्द्रीय कमिटी पुनर्गठन
बैठकले पार्टीको केन्द्रीय कमिटी पुनर्गठन गर्दै प्रभु साहलाई अध्यक्षमा कायम राखेको छ । तिलक थापा मगरलाई सह–अध्यक्ष तथा आत्माराम प्रसाद साह, रीतादेवी साह, समिना हुसेन, अशोककुमार लामा, बिल्टु यादव र धनकुमारी मगरलाई उपाध्यक्षको जिम्मेवारी दिइएको छ ।
त्रिभुवन साह महासचिव तथा सियाराम कुशवाहा, उमेश कुशवाहा, देवी पण्डित रेग्मी, लालबाबु मन्सुरी र रञ्जुकुमारी साह उपमहासचिवमा चयन भएका छन् । प्रवक्ताको जिम्मेवारी सुभाष प्रसाद साहलाई दिइएको छ ।
बैठकले विभिन्न प्रदेश, विशेष कमिटी, जनसंगठन तथा पार्टीका विभागहरूको नेतृत्वसमेत हेरफेर गरेको छ । प्रदेशतर्फ कोशीमा जुरिलाल मोची, मधेशमा आत्माराम साह, बागमतीमा धनकुमारी मगर, गण्डकीमा शिवप्रसाद गौतम, लुम्बिनीमा विजय यादव, कर्णालीमा श्रीभगवान पटेल र सुदूरपश्चिममा विसुन सिंह बोहरालाई इन्चार्जको जिम्मेवारी दिइएको छ ।
त्यस्तै काठमाडौं उपत्यका विशेष कमिटीको इन्चार्ज तिलक थापा मगर र जबस विशेषको इन्चार्ज त्रिभुवन साहलाई तोकिएको छ ।
आजपाले आईटी आर्मी, आम विद्यार्थी मोर्चा, आम किसान मोर्चा, आम महिला मोर्चा, आम दलित मोर्चा, आम मुस्लिम मोर्चा, आम पत्रकार मोर्चा, आम बुद्धिजीवी मोर्चालगायत विभिन्न जनसंगठनको इन्चार्ज तथा अध्यक्षको जिम्मेवारीसमेत तोकेको छ ।
पार्टीका स्कुलिङ विभागको प्रमुखमा तिलक थापा मगर, अनुशासन विभागमा आत्माराम साह, संगठन विभागमा त्रिभुवन साह, प्रचारप्रसार विभागमा सुभाष प्रसाद साह, विदेश विभागमा बालकृष्ण सापकोटा र आर्थिक विभागमा देवकुमारी साहलाई जिम्मेवारी दिइएको छ ।
बैठकका निर्णय सार्वजनिक गर्दै प्रवक्ता साहले राष्ट्रिय संकटको निकासका लागि पार्टीका राजनीतिक तथा संगठनात्मक गतिविधिलाई थप तीव्र बनाउने बताए । उनका अनुसार आगामी कार्ययोजना, वैचारिक तथा राजनीतिक कार्यक्रम, संगठनात्मक अभियान र संघर्षका कार्यक्रमलाई एकीकृत रूपमा अघि बढाइनेछ ।
आजपाको निर्णयले एकातर्फ पार्टीको आन्तरिक संगठनलाई पुनर्गठन र जिम्मेवारी बाँडफाँट गरेको छ भने अर्कोतर्फ अन्तरिम संविधान र अन्तरिम सरकार गठनको मागलाई आगामी राजनीतिक संघर्षको प्रमुख एजेन्डा बनाउने संकेत गरेको छ ।
