वीरगंज । पर्साको पटेर्वा सुगौली गाउँपालिकामा विद्यालय सुधार योजना (एसआईपी) लाई समावेशी तथा सहभागितामूलक बनाउने विषयमा अभिमुखीकरण कार्यक्रम सम्पन्न भएको छ ।
युरोपियन युनियनको आर्थिक सहयोग तथा People in Need (PIN), Accountability Lab Nepal, नेशनल क्याम्पेन फर एजुकेशन नेपाल (NCE Nepal) र नेपाल डिसेबल्ड वुमन एसोसिएसन (NDWA) को सहकार्य तथा दिव्य विकास स्रोत केन्द्र (DDRC), पर्साको साझेदारीमा सञ्चालित पहुँच परियोजना (ACCESS Project) अन्तर्गत कार्यक्रम आयोजना गरिएको हो ।
पटेर्वा सुगौली गाउँपालिकाअन्तर्गत नेपाल राष्ट्रिय माध्यमिक विद्यालय, रंगपुर, नेपाल राष्ट्रिय माध्यमिक विद्यालय, सुगौली दा.प. र नेपाल राष्ट्रिय माध्यमिक विद्यालय, निचुटाका विद्यालय प्रतिनिधिहरूको सहभागितामा कार्यक्रम सञ्चालन गरिएको थियो ।
कार्यक्रममा गाउँपालिकाका शिक्षा शाखा प्रमुख सोलेन्द्र पञ्जियारले विद्यालय सुधार योजना निर्माण तथा अद्यावधिक गर्दा सबै बालबालिकाको पहुँच, सहभागिता र आवश्यकतालाई समेट्नुपर्नेमा जोड दिए । उनले योजनालाई प्रभावकारी रूपमा कार्यान्वयन गर्न विद्यालय तथा समुदायबीच समन्वय आवश्यक रहेको बताए ।
अभिमुखीकरणमा विद्यालयका प्रधानाध्यापक, विद्यालय व्यवस्थापन समितिका अध्यक्ष, शिक्षक–अभिभावक संघका प्रतिनिधि तथा सूचना प्रविधिसम्बन्धी कार्य गर्ने शिक्षकहरूको सहभागिता रहेको थियो । सहभागीलाई विद्यालय सुधार योजनालाई विद्यालयको वास्तविक आवश्यकता तथा प्राथमिकतामा आधारित, समावेशी र सहभागितामूलक बनाउने विषयमा जानकारी दिइएको थियो ।
कार्यक्रमपछि तीनवटै विद्यालयका प्रतिनिधिहरूले असोज मसान्तभित्र विद्यालय सुधार योजनालाई समावेशी दृष्टिकोणबाट अद्यावधिक गरी कार्यान्वयनमा लैजाने प्रतिबद्धता व्यक्त गरेका छन् । यसबाट विशेषगरी पछाडि पारिएका तथा सीमान्तकृत समुदायका बालबालिकाको आवश्यकता र सहभागितालाई विद्यालयको योजनामा समेट्न सहयोग पुग्ने अपेक्षा गरिएको छ ।
कार्यक्रमको सहजीकरण दिव्य विकास स्रोत केन्द्र, पर्साका कार्यकारी निर्देशक रामाकान्त प्रसाद कुर्मीले गरेका थिए । कार्यक्रममा अकाउन्टेबिलिटी ल्याब नेपालका प्रतिनिधि अकलेश कुमार साह तथा दिव्य विकास स्रोत केन्द्र, पर्साका कार्यक्रम जिम्मेवार अमित कुमार राउतले समन्वय तथा सहजीकरणमा सहयोग गरेका थिए ।
आयोजकका अनुसार कार्यक्रममा सहभागी विद्यालयका सरोकारवालाहरूले समावेशी विद्यालय सुधार योजनाको आवश्यकता, प्रक्रिया र प्रभावकारी कार्यान्वयनबारे थप स्पष्टता प्राप्त गर्नुका साथै तीनवटै विद्यालयले समावेशी एसआईपी अद्यावधिक गर्ने प्रतिबद्धता जनाउनु कार्यक्रमको प्रमुख उपलब्धि हो ।
