वीरगञ्ज । जलस्रोत तथा सिँचाइ विकास डिभिजन कार्यालय वीरगञ्जका दुई अधिकृतविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ।
अख्तियारले अधिकृत छैठौं (प्राविधिक) गजेन्द्रप्रसाद जयसवाल र विकी यादवविरुद्ध बुधबार विशेष अदालत काठमाडौंमा भ्रष्टाचार मुद्दा दर्ता गरेको हो।
आर्थिक वर्ष २०८२/०८३ मा पर्साको ठोरी गाउँपालिका–३ मा सञ्चालित ‘जलस्रोतको पुनर्भरण तथा भण्डारण कार्य (सार्वजनिक इनार/पोखरी निर्माण तथा मर्मतसम्भार)’ योजनामा भ्रष्टाचार गरेको आरोप उनीहरूमाथि लागेको छ।
आयोगका अनुसार योजनाको भुक्तानी दिने र धरौटी रकम फिर्ता गर्ने प्रयोजनका लागि सेवाग्राहीसँग दुवै अधिकृतले मिलेमतो गरी ३ लाख ४५ हजार रुपैयाँ घुस लिएका थिए।
कार्यालय समयमा रकम लिन नमिल्ने भन्दै गजेन्द्रप्रसाद जयसवालले अर्को व्यक्तिमार्फत घुस रकम लिएको पुष्टि भएको अख्तियारले जनाएको छ।
अख्तियारले दुवै अधिकृतविरुद्ध भ्रष्टाचार निवारण ऐन, २०५९ को दफा ३ को उपदफा (१) बमोजिमको कसुरमा ३ लाख ४५ हजार रुपैयाँ बिगो कायम गरी सोही रकम बराबरको बिगो तथा कानुनबमोजिमको सजाय मागदाबी गर्दै विशेष अदालतमा आरोपपत्र दायर गरेको जनाएको छ।








