बारा । ब्रह्मकुमारी राजयोग सेवा केन्द्र, डुम्बरवानाको आयोजनामा शनिबार बृहत् निःशुल्क आयुर्वेदिक स्वास्थ्य तथा दन्त क्लिनिक शिविर सम्पन्न भएको छ ।
ब्रह्मकुमारी ममता दिदीको अध्यक्षतामा आयोजित शिविरको उद्घाटन जीतपुरसिमरा उपमहानगरपालिकाका उपप्रमुख भोलाप्रसाद अधिकारीले गरेका थिए । कार्यक्रममा प्रादेशिक आयुर्वेद तथा वैकल्पिक चिकित्सालय, कलैया, बाराकी प्रमुख चिकित्सक डा. पुनिता केसीलगायतको विशेष उपस्थिति रहेको थियो ।
शिविरमा दाँत, मुख तथा गिजा रोग विशेषज्ञ डा. उषा महतो र डा. प्रनिषा सिमखडालगायत विभिन्न क्षेत्रका चिकित्सक, वैद्य तथा स्वास्थ्यकर्मीहरूको सहभागिता रहेको थियो ।
शिविरमा स्वास्थ्य परीक्षण तथा उपचारका लागि बिहानैदेखि सयौँ सेवाग्राहीको भीड लागेको थियो । सेवाग्राहीलाई निःशुल्क फुल बडी स्वास्थ्य जाँच, सुगर, तौल तथा रक्तचाप परीक्षणलगायतका सेवा प्रदान गरिएको थियो ।
त्यसैगरी आयुर्वेदिक चिकित्सक तथा वैद्यहरूले स्वास्थ्यसम्बन्धी परामर्श तथा उपचार सेवा प्रदान गर्नुका साथै आवश्यकताअनुसार निःशुल्क आयुर्वेदिक औषधिसमेत वितरण गरेका थिए । दाँत, मुख तथा गिजासम्बन्धी समस्या भएका सेवाग्राहीका लागि विशेष निःशुल्क दन्त क्लिनिक सेवा पनि सञ्चालन गरिएको थियो ।
आयुर्वेदिक चिकित्सा, प्राकृतिक जीवनशैली तथा नियमित स्वास्थ्य परीक्षणप्रति जनचेतना अभिवृद्धि गर्ने उद्देश्यले आयोजित शिविरबाट ठूलो संख्यामा स्थानीय सेवाग्राही लाभान्वित भएका आयोजकले जनाएको छ । आयोजकका अनुसार यस्ता कार्यक्रमले रोगको समयमै पहिचान, उपचार तथा स्वस्थ जीवनशैलीप्रति समुदायमा जागरूकता बढाउन सहयोग पुग्नेछ ।
