वीरगंज । समावेशी शिक्षाको महत्व र आवश्यकताबारे विद्यार्थी, अभिभावक तथा समुदायमा जनचेतना अभिवृद्धि गर्ने उद्देश्यले पर्साको जिराभवानी गाउँपालिका–३ परसवामा वक्तृत्वकला प्रतियोगिता सम्पन्न भएको छ ।
श्री नेपाल राष्ट्रिय माध्यमिक विद्यालय सेढवा, श्री महेन्द्र नेपाल निम्न माध्यमिक विद्यालय परसवा तथा स्थानीय दलित समुदायको सहभागितामा ‘समावेशी शिक्षाको महत्व तथा आवश्यकता’ विषयमा प्रतियोगिता आयोजना गरिएको हो ।
युरोपियन युनियनको आर्थिक सहयोग तथा पिपुल इन निड, अकाउन्टेबिलिटी ल्याब नेपाल, नेसनल क्याम्पेन फर एजुकेसन नेपाल (एनसीई नेपाल) र नेपाल अपाङ्ग महिला संघको सहकार्य तथा दिव्य विकास स्रोत केन्द्र, पर्साको साझेदारीमा सञ्चालित पहुँच परियोजना (एसीसीईएसएस प्रोजेक्ट) अन्तर्गत फ्युचर स्कुल एन्ड कम्युनिटी इन्गेजमेन्ट अभियानमार्फत कार्यक्रम आयोजना गरिएको थियो ।
दिव्य विकास स्रोत केन्द्र, पर्साका कार्यकारी निर्देशक रामाकान्त प्रसाद कुर्मीको अध्यक्षतामा भएको कार्यक्रममा श्री नेपाल राष्ट्रिय माध्यमिक विद्यालय सेढवाका विद्यालय व्यवस्थापन समिति अध्यक्ष अशोक चौधरी प्रमुख अतिथिका रूपमा सहभागी हुनुभएको थियो ।
कार्यक्रममा श्री महेन्द्र नेपाल निम्न माध्यमिक विद्यालयका शिक्षक उपेन्द्र चौधरी, समाजसेवी दिनेश्वर महतो तथा अकाउन्टेबिलिटी ल्याब नेपालका प्रतिनिधि अकलेश साहको सहभागिता रहेको थियो । कार्यक्रमको सहजीकरण दिव्य विकास स्रोत केन्द्र, पर्साका कार्यक्रम जिम्मेवार व्यक्ति अमित कुमार राउतले गर्नुभएको थियो ।
वक्तृत्वकला प्रतियोगितामा दुवै विद्यालयका कक्षा ९ सहित विभिन्न कक्षाका गरी ७ जना विद्यार्थी सहभागी भएका थिए । प्रतियोगितामा रिया चौबे प्रथम, निलिमा कुमारी द्वितीय र हसिना खातुन तृतीय हुनुभएको थियो । विजयी विद्यार्थीलाई पुरस्कार तथा सम्मान प्रदान गरिएको थियो ।
कार्यक्रममा जात, लिङ्ग, अपाङ्गता, आर्थिक अवस्था वा अन्य कुनै आधारमा विभेद नगरी सबै बालबालिकालाई समान रूपमा शिक्षाको अवसर सुनिश्चित गर्नुपर्नेमा जोड दिइएको थियो । सहभागी वक्ताहरूले समावेशी शिक्षाको प्रभावकारी कार्यान्वयनका लागि विद्यालय, परिवार, समुदाय तथा सम्बन्धित सरोकारवालाबीच सहकार्य आवश्यक रहेको बताएका थिए ।
कार्यक्रमले विद्यालय तथा समुदायमा समावेशी शिक्षाको महत्व र आवश्यकताबारे सकारात्मक सन्देश प्रवाह गर्नुका साथै विद्यार्थी, अभिभावक तथा समुदायमा चेतना अभिवृद्धि गर्न सहयोग पुगेको आयोजकले जनाएको छ ।
कार्यक्रममा समुदायबाट १०० जना र विद्यालयबाट ५० जना गरी करिब १५० जनाको सहभागिता रहेको थियो ।
