वीरगंज । क्रियाशील युवा पत्रकार मञ्च नेपालले आफ्नो संगठन विस्तार गर्दै १० जना पत्रकारलाई औपचारिक रूपमा संस्थामा आबद्ध गराएको छ । वीरगंजस्थित क्लासिक ब्यांक्वेट होटलमा आइतबार आयोजित कार्यक्रममा नवआबद्ध पत्रकारहरूलाई स्वागत तथा प्रमाणपत्र प्रदान गरिएको हो ।
संस्थामा आबद्ध हुनेहरूमा अभिलाष गुप्ता, रश्मिराज भण्डारी, सन्तोष कुशवाहा, अर्जुन चौधरी, प्रतीक्षा श्रेष्ठ, पूजा महतो, जितेन्द्र साह, भगवानप्रसाद कुर्मी (कुणाल), पुनम चौधरीलगायत रहेका छन् ।
कार्यक्रमका प्रमुख अतिथि नेपाल पत्रकार महासंघका केन्द्रीय लेखा संयोजक केसी लामिछानेले नवआबद्ध पत्रकारहरूलाई गम्छा तथा टीका लगाएर प्रमाणपत्र प्रदान गर्दै स्वागत गरे । उनले युवा पत्रकारलाई संगठित गर्दै पत्रकारिताको व्यावसायिक विकासमा संस्थाले भूमिका खेल्नुपर्ने बताए ।
लामिछानेले सञ्चार क्षेत्रलाई आर्थिक रूपमा कमजोर बनाउने गतिविधिप्रति पत्रकार महासंघले आवाज उठाउँदै आएको उल्लेख गर्दै पत्रकारहरूले प्रविधिको प्रयोगसँगै खोज तथा अनुसन्धानमा आधारित पत्रकारितालाई प्राथमिकता दिनुपर्नेमा जोड दिए । पछिल्लो समय प्रविधिको सहजताका कारण समाचार उत्पादन छिटो भए पनि तथ्यको गहिराइ र विश्वसनीयतामा कमी आउन नदिन पत्रकारहरू सचेत हुनुपर्ने उनको भनाइ थियो ।
कार्यक्रममा नेपाल पत्रकार महासंघ मधेस प्रदेशका अध्यक्ष श्याम बञ्जाराले सञ्चारमाध्यमको आर्थिक अवस्था, पत्रकारले भोग्दै आएका समस्या तथा व्यावसायिक सुरक्षाका विषयमा धारणा राखे । उनले पत्रकारहरूको श्रमको सम्मान, पेशागत सुरक्षा र प्रेस स्वतन्त्रताका लागि पत्रकारबीच सहकार्य आवश्यक रहेको बताए ।
नेपाल पत्रकार महासंघ पर्साका अध्यक्ष ओमप्रकाश खनालले पत्रकारितासँग सम्बन्धित महत्वपूर्ण विषयमा बहस गर्ने वातावरण निर्माण गर्न क्रियाशील युवा पत्रकार मञ्चले भूमिका खेलिरहेको बताए । उनले महासंघ र मञ्चबीच सहकार्यलाई निरन्तरता दिने प्रतिबद्धता जनाए ।
समाजवादी प्रेस संगठन नेपालका मधेस प्रदेश अध्यक्ष मनोज पटेलले पत्रकारहरू विभिन्न पक्षबाट आउने दबाब र घेराबन्दीको सामना गर्दै काम गर्नुपर्ने अवस्था रहेको बताए । उनले पेशागत अधिकार र प्रेस स्वतन्त्रताको संरक्षणका लागि पत्रकारहरू एकताबद्ध हुनुपर्नेमा जोड दिए ।
प्रेस सेन्टर नेपालका मधेस प्रदेश अध्यक्ष निरज पिठाकोटे मगरले नयाँ पुस्ताका पत्रकारलाई निरन्तर अध्ययन, सिकाइ र तथ्यमा आधारित पत्रकारितालाई प्राथमिकता दिन आग्रह गरे ।
संस्थाका सल्लाहकार प्रताप श्रेष्ठले कृत्रिम बौद्धिकता (एआई) को बढ्दो प्रयोगले पत्रकारितामा नयाँ चुनौती र अवसर दुवै थपिएको बताए । उनले एआईको प्रयोग गरे पनि पत्रकारहरूले मौलिकता, तथ्य जाँच र खोजमूलक क्षमतालाई बलियो बनाउनुपर्नेमा जोड दिए ।
कार्यक्रममा नेपाल पत्रकार महासंघका महासचिव तथा प्रेस युनियनका अध्यक्ष विजय चौहान, प्रेस सेन्टर पर्साका अध्यक्ष शिवनाथ यादव, समाजवादी प्रेस संगठन पर्साका अध्यक्ष शम्भु कुमार सुमन, पत्रकार जगत राई, प्याब्सन पर्साकी वरिष्ठ उपाध्यक्ष सुशीला साह, महानगर अध्यक्ष राहुल श्रीवास्तव, महासचिव अमित आलोक, नेपाल इनोभेटिभ सोसाइटीका अध्यक्ष कमल चौगाई, समाजसेवी प्रकाश उपाध्याय तथा संस्थाका निवर्तमान अध्यक्ष प्रणय साहलगायतले शुभकामना मन्तव्य राखेका थिए ।
संस्थाका अध्यक्ष आनन्द पटेलको अध्यक्षतामा सम्पन्न कार्यक्रममा उपाध्यक्ष वीरेन्द्र साहले स्वागत मन्तव्य राखेका थिए भने महासचिव राकेश कुमार साहले सहजीकरण गरेका थिए ।
