वीरगंज । पर्साको धोबिनी गाउँपालिका–५ धोबिनीमा घरमा चोरीसँगै ६२ वर्षीया महिलाको हत्या भएको घटनामा संलग्न रहेको आरोपमा प्रहरीले तीन युवकलाई पक्राउ गरेको छ ।
पक्राउ पर्नेमा धोबिनी गाउँपालिका–५ का १८ वर्षीय चन्दन कुमार पटेल, १८ वर्षीय राजकपुर बैठा र १८ वर्षीय रामु पासवान रहेका छन् ।
गत आइतबार राति स्थानीय श्रीनिवास साह तुराहाको घरमा चोरी भएको थियो । घरको दोस्रो तल्लामा सुतेकी उनकी पत्नी ६२ वर्षीया लखरजिया देवी सोमबार बिहान सोही कोठामा मृत अवस्थामा फेला परेकी थिइन् । उनको कोठामा रहेको दराज र बाक्सा फुटाएर नगद तथा गरगहना चोरी भएको थियो ।
प्रहरीका अनुसार घटनाको राति तीनै जनाले बैठाको घरमा गाँजा सेवन गरी चोरी गर्ने योजना बनाएका थिए । त्यसपछि घरको पछाडिको पर्खाल हुँदै माथिल्लो तलाको झ्यालबाट उनीहरू घरभित्र प्रवेश गरेका थिए । दराज फुटाएर नगद तथा गरगहना चोरी गरेपछि अर्को कोठामा रहेको टिनको बाक्सा फुटाउँदै गर्दा लखरजिया देवी ब्युँझिएर माथिल्लो तलामा पुगेकी थिइन् ।
उनीहरूलाई देखेपछि तीनै जनाले फलामको धारिलो वस्तुले प्रहार गरी लखरजियाको हत्या गरेको र नगद तथा गरगहना लिएर फरार भएको प्रारम्भिक अनुसन्धानबाट खुलेको प्रहरीले जनाएको छ ।
घटनाको अनुसन्धानका क्रममा प्रहरीले पटेललाई शुक्रबार वीरगंजबाट तथा बैठा र पासवानलाई शनिबार धोबिनी गाउँपालिकाबाट पक्राउ गरेको जिल्ला प्रहरी कार्यालय पर्साका प्रवक्ता एवं प्रहरी नायब उपरीक्षक चक्रबहादुर मल्लले जानकारी दिए ।
पक्राउ परेकाहरूको साथबाट चोरी भएको रकम, सुनका गरगहना, गाडीको स्प्रिङ पत्ता एक थान, पिलास एक थान र चक्कु एक थान बरामद गरिएको प्रहरीले जनाएको छ ।
पक्राउ परेका तीनै जनालाई जिल्ला अदालत पर्साबाट कर्तव्य ज्यान कसूरमा सात दिनको म्याद थप गरी हिरासतमा राखेर थप अनुसन्धान भइरहेको जिल्ला प्रहरी कार्यालय पर्साले जनाएको छ ।
