वीरगंज । विपद्का समयमा उत्पन्न हुन सक्ने जोखिम र त्यसबाट जोगिने उपायबारे समुदायमा जनचेतना फैलाउने उद्देश्यले वीरगंजमा विपद् व्यवस्थापनसम्बन्धी जनचेतनामूलक कार्यक्रम आयोजना गरिएको छ ।
सामुदायिक सेवा केन्द्र तथा सामुदायिक प्रहरी सेवा केन्द्र, मीनाबजारको आयोजनामा घण्टाघर क्षेत्रमा स्थानीय बासिन्दालाई विपद्का समयमा अपनाउनुपर्ने सावधानी तथा सुरक्षित रहने उपायबारे जानकारी गराइएको हो ।
कार्यक्रममा विपद्का समयमा उत्पन्न हुन सक्ने आर्थिक, मानसिक तथा सामाजिक जोखिम, अस्थायी शिविरमा बस्दा अपनाउनुपर्ने सावधानी तथा महिला र बालबालिकामाथि हुन सक्ने सम्भावित जोखिमबारे सहभागीलाई सचेत गराइएको थियो ।
सामुदायिक प्रहरी सेवा केन्द्र, मीनाबजारकी इन्चार्ज प्रहरी हवल्दार सन्ध्या गुरौले विपद्का समयमा हुन सक्ने असुरक्षित वैदेशिक रोजगारी, मानव बेचबिखन तथा अन्य जोखिमबाट जोगिन अपनाउनुपर्ने उपायबारे जानकारी गराइन् ।
त्यसैगरी, आगलागी, बाढी, भूकम्पलगायतका विपद्का समयमा सुरक्षित रहने उपाय, अपरिचित व्यक्तिका शङ्कास्पद गतिविधिप्रति सतर्क रहने तथा कुनै समस्या उत्पन्न भएमा नजिकको प्रहरी कार्यालयमा सम्पर्क गर्न सहभागीलाई आग्रह गरिएको थियो ।
कार्यक्रममा पर्चा तथा प्रचार सामग्री वितरण गर्दै विपद्का समयमा विशेषगरी महिला तथा बालबालिका बढी जोखिममा पर्न सक्ने भएकाले समुदायस्तरमा निरन्तर जनचेतना आवश्यक रहेकोमा जोड दिइएको थियो ।
कार्यक्रममा सामुदायिक सेवा केन्द्र तथा सामुदायिक प्रहरी सेवा केन्द्र, मीनाबजारमा कार्यरत प्रहरी कर्मचारी तथा पदाधिकारीको सहभागिता रहेको थियो ।
