कलैया । बाराको जीतपुरबाट ८० ग्राम खैरो हेरोइन (ब्राउन सुगर) सहित दुई जना पक्राउ परेका छन् ।
सशस्त्र प्रहरीको औद्योगिक सुरक्षा बेस जीतपुरबाट खटिएको टोलीले जीतपुरसिमरा उपमहानगरपालिका–५ स्थित अशोक स्टील नजिकबाट उनीहरूलाई पक्राउ गरेको हो ।
पक्राउ पर्नेमा पर्साको सखुवा प्रसौनी गाउँपालिका–४ का २८ वर्षीय हुस नयन अंसारी र वीरगंज महानगरपालिका–१४ का १८ वर्षीय राजन पासवान रहेका छन् ।
वीरगंजबाट पथलैयातर्फ जाँदै गरेको प्र.२–०३–००९ प ३७५६ नम्बरको मोटरसाइकलमा सवार उनीहरूलाई सशस्त्र प्रहरी बल नेपाल इन्टेलिजेन्स ब्यूरोको सूचनाका आधारमा पक्राउ गरिएको सशस्त्र प्रहरी नायब उपरीक्षक बिक्रममणी अधिकारीले जानकारी दिए ।
बरामद लागूऔषधसहित पक्राउ परेका दुवै जनालाई आवश्यक अनुसन्धान तथा कारबाहीका लागि इलाका प्रहरी कार्यालय सिमरामा बुझाइएको सशस्त्र प्रहरीले जनाएको छ ।
