नेपालगन्ज । नेपाली कांग्रेसको १५औँ महाधिवेशनअन्तर्गत नेपालगन्ज उपमहानगरपालिका नगर सभापति पदका लागि युवा नेता विनोद रिजालले सशक्त दाबी प्रस्तुत गरेका छन् । लामो राजनीतिक अनुभव, संगठन निर्माणमा सक्रियता र कार्यकर्तासँगको आत्मीय सम्बन्धलाई आधार बनाउँदै रिजाल नेतृत्वको दौडमा अघि बढेका हुन् ।
२०४६ सालदेखि नेपाली कांग्रेसको राजनीतिमा सक्रिय रिजालले विद्यार्थी राजनीतिबाट आफ्नो राजनीतिक यात्रा सुरु गरेका हुन्। उनले नेपाल विद्यार्थी संघ बाँकेको जिल्ला सभापतिको जिम्मेवारी दुईपटक सम्हालिसकेका छन् । विद्यार्थी आन्दोलनदेखि पार्टी संगठनसम्म काम गरेको अनुभव रिजालसँग छ ।
रिजाल नेपाल तरुण दल बाँकेको जिल्ला सचिवको जिम्मेवारीमा समेत सक्रिय छन् । विभिन्न तह तथा भ्रातृ संगठनमा रहेर काम गरेको अनुभवका कारण पार्टीको संगठनात्मक संरचना र कार्यकर्ताको भावना बुझ्ने नेताका रूपमा उनले आफ्नो पहिचान बनाएका छन् ।
कार्यकर्ताको सुखदुःखमा साथ दिने, संगठनका गतिविधिमा निरन्तर सक्रिय रहने तथा युवा र अग्रज नेताबीच समन्वय गर्दै अघि बढ्ने आफ्नो कार्यशैलीलाई रिजालले नेतृत्वको आधार बनाएका छन् ।
नगर सभापतिमा निर्वाचित भए पार्टी संगठनलाई थप सुदृढ बनाउने, कार्यकर्ताको सक्रियता बढाउने र संगठनलाई एकताबद्ध बनाएर अघि बढ्ने लक्ष्यसहित आफू मैदानमा उत्रिएको रिजालको भनाइ छ ।
कांग्रेसको १५औँ महाधिवेशनअन्तर्गत वडा तहबाट अधिवेशन प्रक्रिया अघि बढिरहेका बेला नेपालगन्ज नगर सभापतिको प्रतिस्पर्धा पनि चासोको विषय बनेको छ । लामो राजनीतिक अनुभव र संगठनात्मक सक्रियताका कारण रिजालको दाबेदारीलाई अर्थपूर्ण रूपमा हेरिएको छ ।
चार दशक नजिकको राजनीतिक यात्रामा संघर्ष, अनुभव र संगठनलाई आधार बनाउँदै आएका रिजालले अब नेपालगन्ज कांग्रेसको नेतृत्वमा नयाँ जिम्मेवारी सम्हाल्ने लक्ष्यसहित आफ्नो दाबी प्रस्तुत गरेका छन् ।
