वीरगंज । तेरापन्थ युवक परिषद् वीरगंजले आयोजना गरेको सप्ताहव्यापी वृहत् रक्तदान अभियानअन्तर्गत आदर्शनगरस्थित स्काईलाइन मल वीरगंजमा आयोजित रक्तदान कार्यक्रममा ८ महिलासहित ६६ जनाले रक्तदान गरेका छन् ।
राउन्ड टेबल वीरगंज–३ को सहकार्यमा आयोजित कार्यक्रममा विभिन्न क्षेत्रका युवायुवती तथा सामाजिक अभियन्ताहरूले उत्साहजनक सहभागिता जनाउँदै रक्तदान गरेका हुन् ।
रक्तदान गर्नेमा अदिती अग्रवाल, सन्ध्या चौधरी, कविता केडिया, श्रेया चाचान, खुशी शर्मा, दिपाञ्जली बरनवाल, मृदुला चाचान, सीता शर्मा, मेराज आलम, अनमोल साह, बिपिन ठाकुर, मोहम्मद बेलाल, कृष्ण पासवान, जोशन श्रेष्ठ र रोबिन बिकलगायत रहेका छन् ।
कार्यक्रम तेरापन्थ युवक परिषद् वीरगंजका अध्यक्ष सुनिल दुगड र राउन्ड टेबल वीरगंज–३ का अध्यक्ष अनुज क्यालको संयुक्त अध्यक्षतामा सम्पन्न भएको थियो। कार्यक्रममा परिषद्का रक्तदान संयोजक सौरभ भुटोरिया, रक्तदान अन–कलका आशीष चोरडिया, पंकज बैद, अनिल बैद, राउन्ड टेबलका सचिव अमन मित्तल, दिपक बैद, पीयूष चाचान, अनमोल छपरियालगायतकाे सहभागिता रहेको थियो ।
कार्यक्रममा सामाजिक अभियन्ता लालबाबु सिंहले वीरगंज आसपासका क्षेत्रमा रगतको अभाव भइरहेको जानकारी पाएपछि तेरापन्थ युवक परिषद्ले गत वर्षझैँ यस वर्ष पनि विभिन्न संघसंस्थासँग सहकार्य गर्दै सप्ताहव्यापी वृहत् रक्तदान अभियान सञ्चालन गर्नु सराहनीय कार्य भएको बताए ।
तेरापन्थ युवक परिषद् वीरगंजले शुक्रबार ब्योधा हस्पिटल वीरगंजमा रक्तदान कार्यक्रम आयोजना गर्दै सप्ताहव्यापी वृहत् रक्तदान अभियानको शुभारम्भ गरेको थियो । अभियानअन्तर्गत स्काईलाइन मलमा रक्तदान कार्यक्रम सम्पन्न गरिएको हो भने मंगलबार किरण आँखा अस्पताल वीरगंजको सहयोगमा अस्पताल परिसरमा रक्तदान कार्यक्रम आयोजना गरिने परिषद्ले जनाएको छ ।
अभियानअन्तर्गत आगामी दिनमा विभिन्न कलकारखाना, अस्पताल, क्लिनिक, संघसंस्था तथा विद्यालयलगायतका स्थानमा निरन्तर रक्तदान कार्यक्रम आयोजना गरी बढीभन्दा बढी पिन्ट रगत संकलन गर्ने लक्ष्य रहेको परिषद्का अध्यक्ष सुनिल दुगडले बताए । यस अभियानले रक्तसञ्चार केन्द्र वीरगन्जमा हुने रगतको अभाव केही हदसम्म पूर्ति गर्न सहयोग पुग्ने उनले बताए ।
रक्तसञ्चार केन्द्र वीरगन्जका प्राविधिक श्रीराम ठाकुरको नेतृत्वमा रहेको नेपाल रेडक्रस सोसाइटीको स्वयंसेवक टोलीले रक्तदाताहरूलाई रक्तदान गर्न सहजीकरण गरेको थियो ।
