वीरगंज । बाराको जितपुरसिमरा उपमहानगरपालिका–२ स्थित सम्झना स्टाफ होटलमा चक्कु प्रहारबाट एक युवककाे मृत्यु भएको घटनामा संलग्न रहेको आरोपमा प्रहरीले मुख्य आरोपीसहित ६ जनालाई पक्राउ गरेको छ ।
जिल्ला प्रहरी कार्यालय बाराका अनुसार शनिबार साँझ करिब ५ः३० बजे होटलमा जितपुरसिमरा–१६ का २२ वर्षीय आयुष राईले सोही ठाउँ बस्ने ३५ वर्षीय शेरबहादुर खड्कामाथि चक्कु प्रहार गरेका थिए ।
चक्कु प्रहारबाट घाँटीमा गम्भीर चोट लागेका खड्कालाई उपचारका लागि वीरगंजस्थित बयोधा अस्पताल लगिएको थियो । उनको उपचारका क्रममा साँझ ६ः४० बजे मृत्यु भएको प्रहरीले जनाएको छ ।
घटनापछि फरार भएका राईलाई प्रहरीले राति करिब १० बजे जितपुरसिमरा–१६ महेन्द्रनगरस्थित धानबारीबाट पक्राउ गरेको थियो ।
घटनासँग सम्बन्धित रहेको आरोपमा प्रहरीले अन्य पाँच जनालाई समेत पक्राउ गरेको छ । पक्राउ पर्नेमा पर्साको ठोरी गाउँपालिका–१ घर भई जितपुरसिमरा–२ बस्ने ३४ वर्षीया बिन्दु तामाङ, जितपुरसिमरा–२ का ३० वर्षीय रामबहादुर तिमिल्सिना, सोही ठाउँका २३ वर्षीय रत्न पाख्रिन तामाङ, जितपुरसिमरा–१६ की ४३ वर्षीया शान्ति राई र सोही ठाउँकी ४० वर्षीया सिता थापा मगर रहेका छन् ।
प्रहरीले पक्राउ परेकाविरुद्ध ज्यानसम्बन्धी कसुरमा मुद्दा दर्ता गरी बारा जिल्ला अदालत कलैयाबाट पाँच दिनको म्याद थप गरेको जनाएको छ । घटनाबारे इलाका प्रहरी कार्यालय सिमराले थप अनुसन्धान गरिरहेको जिल्ला प्रहरी कार्यालय बाराका सूचना अधिकारी प्रहरी नायव उपरीक्षक मिनबहादुर घलेले जानकारी दिएका छन् ।
