वीरगंज । लाङटाङ लिरुङ हिमाल क्षेत्रमा गएको हिम–चट्टान पहिरोपछि भोटेकोशी र त्रिशूली नदी प्रणालीमा आएको बाढी तथा पहिरोमा परी बेपत्ता भएका बाराको परवानीपुर गाउँपालिका–५ बहुअरी टोलका ३६ वर्षीय नमोनारायण पटेलको २३ दिनसम्म खोजी गर्दा पनि अवस्था पत्ता लाग्न नसकेपछि परिवारले हिन्दु संस्कारअनुसार कुशको शव बनाएर शनिबार अन्तिम संस्कार गरेको छ ।
प्रभु पटेलका जेठा छोरा नमोनारायण बाढीमा बेपत्ता भएपछि परिवार, आफन्त र गाउँलेले घटनाको दिनदेखि नै उनको खोजी गर्दै आएका थिए । प्रहरी प्रशासन, स्थानीय तह तथा सम्भावित विभिन्न स्थानमा निरन्तर खोजी गरिए पनि उनको अवस्था वा शवबारे कुनै जानकारी प्राप्त हुन सकेन ।
२३ दिनसम्म खोजतलास गर्दा पनि जीवित वा मृत अवस्थामा फेला नपरेपछि परिवारले धार्मिक तथा सामाजिक परम्पराअनुसार कुशको प्रतीकात्मक शव बनाएर अन्तिम संस्कार गरेको हो ।
अन्तिम संस्कारका क्रममा बहुअरी टोल शोकमग्न बनेको थियो । आफन्त, छिमेकी तथा स्थानीयवासी भावुक बनेका थिए । नमोनारायणका बुवा प्रभु पटेलले जेठो छोरा यसरी बेपत्ता भएर अन्ततः कुशको शवमार्फत अन्तिम संस्कार गर्नुपर्ने अवस्था आउला भन्ने आफूले कहिल्यै कल्पना नगरेको बताए ।
२३ दिनसम्म छोरा फर्किने आशामा बसे पनि निरन्तर खोजी गर्दा कुनै खबर नआएपछि भारी मनका साथ अन्तिम संस्कार गर्नुपरेको उनले बताए ।
नमोनारायणका भाइ धरमेश पटेलले दाइको खोजीका लागि सम्भव भएसम्म सबै ठाउँमा पुगेर खोजतलास गरेको बताए । प्रहरी प्रशासनसँग समन्वय गर्नुका साथै बाढी प्रभावित विभिन्न स्थानमा पुगेर खोजी गरे पनि दाइको कुनै अत्तोपत्तो नलागेको उनको भनाइ छ ।
“२३ दिनदेखि दाइको खोजीमा हामीले धेरै ठाउँ धायौँ । प्रहरी प्रशासनसँग समन्वय गर्यौँ, स्थानीय निकायलाई जानकारी गरायौँ, घटना भएको ठाउँदेखि सम्भावित अन्य स्थानसम्म पुग्यौँ, तर दाइको कुनै खबर पाएनौँ,” धरमेशले भने, “जीवित छन् कि छैनन् भन्ने समेत थाहा नपाई बस्नुपर्ने अवस्था भयो। अन्ततः हिन्दु रीतिरिवाजअनुसार अन्तिम संस्कार गर्न बाध्य भयौँ ।”
परिवारका अनुसार लामो समयसम्म खोजी गर्दा समेत कुनै सुराक नपाएपछि धार्मिक परम्पराअनुसार कुशको शव बनाएर दाहसंस्कार गरिएको हो । शव फेला नपरे पनि अन्तिम संस्कार गर्नुपरेको अवस्थाले परिवारलाई शोकसँगै अनिश्चितताको पीडा थपिएको छ ।
अन्तिम संस्कारमा स्थानीय राजनीतिकर्मी, सामाजिक अगुवा, आफन्त तथा ठूलो संख्यामा स्थानीयवासीको सहभागिता रहेको थियो । दाहसंस्कारका क्रममा उपस्थित धेरै स्थानीयवासी भावुक बनेका थिए ।
यसैबीच, पीडित परिवारले विपत्तिको यस्तो कठिन अवस्थामा स्थानीय सरकारबाट अपेक्षित साथ र सहयोग प्राप्त हुन नसकेको गुनासो गरेको छ । परिवारले आफूहरूले भोगिरहेको पीडा र समस्याप्रति स्थानीय सरकारले आवश्यक चासो र सहयोग गर्नुपर्ने अपेक्षा राखेको जनाएको छ ।
बाढीमा बेपत्ता भएको २३ दिन बितिसक्दा पनि नमोनारायणको वास्तविक अवस्थाबारे आधिकारिक जानकारी नआउनुले परिवारमा पीडा र अन्योल कायमै छ । शवसमेत फेला नपरी अन्तिम संस्कार गर्नुपर्ने बाध्यताले परिवारलाई शोकसँगै अनिश्चितताको पीडामा छोडेको छ ।
