वीरगंज । नेपाली कांग्रेस छिपहरमाई गाउँपालिका समितिका सचिव रुपेश कुमार उपाध्यायले पार्टी परित्याग गरेका छन् ।
उपाध्यायले शुक्रबार सामाजिक सञ्जाल फेसबुकमार्फत आफूले आजकै मितिदेखि नेपाली कांग्रेस परित्याग गरेको घोषणा गरेका हुन् । उनले कांग्रेसमा रहँदा आफूले इमानदारीपूर्वक काम गरेको उल्लेख गर्दै पार्टीका नेता तथा आफूलाई सहयोग गर्ने सबैप्रति आभार व्यक्त गरेका छन् ।
उपाध्यायले फेसबुकमा आफूले कांग्रेसको झन्डा बोकेर अन्य दललाई कहिल्यै मत नदिएको उल्लेख गर्दै अब आफू कुनै राजनीतिक दलको दबाब र आदेशमा नरही स्वतन्त्र नागरिकका रूपमा रहने बताएका छन् । उनले पार्टीमा रहँदा आफूलाई माया तथा सहयोग गर्ने नेता रमेश पाण्डे, रमेश रिजाल र किशोरी साहप्रति विशेष धन्यवादसमेत व्यक्त गरेका छन् ।
‘अब सकेनँ’ भन्दै पार्टी परित्याग गरेका उपाध्यायले आफूलाई लामो समयदेखि रहेको राजनीतिक बोझ हटेको महसुस भएको र पार्टीबाट अलग भएपछि आफू हलुका तथा खुसी भएको बताएका छन् ।
स्थानीय तहमा भने उपाध्यायले आगामी दिनमा राष्ट्रिय स्वतन्त्र पार्टी (रास्वपा) मा प्रवेश गर्ने तयारीस्वरूप कांग्रेस परित्याग गरेको चर्चा चलेको छ । तर, उनले आफ्नो फेसबुक पोस्टमा रास्वपामा प्रवेश गर्नेबारे भने औपचारिक घोषणा गरेका छैनन् ।
