वीरगंज । पर्सा प्रहरीले नेकपा एमालेका नेता एवं जगरनाथपुर गाउँपालिकाका पूर्वअध्यक्ष जालिम मियाँका ४६ वर्षीय जेठा छोरा नासिर अहमदलाई पक्राउ गरेको छ ।
ज्यानसम्बन्धी कसुर तथा सार्वजनिक न्यायविरुद्धको कसुरमा जगरनाथपुर गाउँपालिका वडा नं. ५ घर भई हाल वीरगंज १३ मुर्ली बस्दै आएका नासिरलाई पक्राउ गरिएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक चक्रबहादुर मल्लले जानकारी दिए ।
प्रहरीका अनुसार नासिरलाई शुक्रबार साँझ वीरगंज महानगरपालिका–१३ मुर्लीबाट पक्राउ गरिएको हो । उनीमाथि नातामा साली पर्ने एक महिलाको हत्या गरेको आरोप रहेको प्रहरीले जनाएको छ ।
२०७८ सालमा ती महिलाको शव श्मशान घाटमा दफन गर्ने क्रममा प्रहरीले नियन्त्रणमा लिएको थियो । उक्त घटनामा अनुसन्धान अघि बढाउँदै आएको प्रहरीले हत्या आरोपमा करिब पाँच वर्षपछि नासिरलाई पक्राउ गरेको हो ।
त्यो बेला प्रहरीले पहुँचको आधारमा मुद्दा अगाडि नबढाएको आरोप लागेको थियो । प्रहरीले ५ बर्षपछि अहिले आएर मुद्दाको अनुसन्धान अगाडी बढाएपछि घटनामा संलगन अन्य आरोपित फरार भएका छन् ।
