वीरगंज । भारतको मुजफ्फरपुरमा अलपत्र अवस्थामा रहेकी एक नेपाली महिलाको उद्धार गरी परिवारसँग पुनर्मिलन गराइएको छ ।
जिल्ला प्रहरी कार्यालय पर्सा र मानवसेवा आश्रम वीरगंजको समन्वय तथा सहकार्यमा भदौ २७ गते शनिबार ती महिलालाई मुजफ्फरपुरबाट उद्धार गरी वीरगंज ल्याइएको थियो ।
भारतीय प्रहरी, जिल्ला प्रहरी कार्यालय पर्सा तथा मानवसेवा आश्रम वीरगंजकाे संयुक्त प्रयास, समन्वय र सहकार्यमा उद्धार सम्भव भएको मानवसेवा आश्रमले जनाएको छ । वीरगंज ल्याएपछि आश्रमले आवश्यक हेरचाह तथा संरक्षण प्रदान गर्दै उनको परिवारसँग सम्पर्क र समन्वय थालेको थियो ।
निरन्तरको प्रयासपछि ती महिलाका बुवासँग सम्पर्क स्थापित भएको थियो । त्यसपछि आज जिल्ला प्रहरी कार्यालय पर्साका प्रहरी उपरीक्षक पवनकुमार भट्टराई, प्रहरी नायब उपरीक्षक चक्र मल्ल तथा मानवसेवा आश्रम वीरगंजका संस्थापक अभियन्ता देवेश गुप्ताको उपस्थितिमा उनलाई बुवाको जिम्मा लगाइएको हो ।
लामो समयदेखि परिवारबाट टाढा रहेकी ती महिलाको उद्धारपछि परिवारसँग सफल पुनर्मिलन भएको मानवसेवा आश्रमले जनाएको छ ।
उद्धार तथा पारिवारिक पुनर्मिलनमा सहयोग र समन्वय गर्ने भारतीय प्रहरी, जिल्ला प्रहरी कार्यालय पर्सा तथा सम्पूर्ण सहयोगीप्रति मानवसेवा आश्रम वीरगंजले आभार व्यक्त गरेको छ ।
