वीरगंज । पर्साको कालिकामाई गाउँपालिका–२ भेडिहारीस्थित श्री कालिका एकेडेमी बोर्डिङ स्कुलमा बाल दिवसको अवसरमा सांस्कृतिक कार्यक्रम तथा वक्तृत्वकला प्रतियोगिता सम्पन्न भएको छ ।
विद्यालय परिसरमा आयोजित कार्यक्रमको उद्घाटन कालिकामाई गाउँपालिका–२ का वडाध्यक्ष सोनालाल प्रसाद चौरसियाले गरेका थिए । विद्यालय व्यवस्थापन समितिका अध्यक्ष राजकुमार चौरसियाको सभापतित्वमा सम्पन्न कार्यक्रममा रेडियो पोखरियाका अध्यक्ष एवं कालिका टाईम्सका प्रबन्ध निर्देशक छठु साह, राष्ट्रिय स्वतन्त्र पार्टीका स्थानीय नेता जोगिन्द्र चौरसिया, जनता समाजवादी पार्टीका स्थानीय नेता माओ कुशवाहालगायतको उपस्थिति रहेको थियो ।
बाल दिवसका अवसरमा आयोजित वक्तृत्वकला प्रतियोगितामा कक्षा ७ की गुडिया खातुन प्रथम भएकी छन् । यस्तै, कक्षा ६ का सुरज राम द्वितीय र कक्षा ७ का सोनु साह कानु तृतीय भएका छन् ।
प्रतियोगिताका विजेता तीनै जना विद्यार्थीलाई विद्यालयले पुरस्कार प्रदान गरेको जनाएको छ । कार्यक्रममा विद्यार्थीहरूले विभिन्न सांस्कृतिक प्रस्तुति समेत प्रस्तुत गरेका थिए ।
