वीरगञ्ज । नेपाल प्रिमियर लिग (एनपीएल) मा जनकपुर बोल्ट्सले पहिलो जित दर्ता गरेको छ। कीर्तिपुरस्थित त्रिवि अन्तर्राष्ट्रिय क्रिकेट मैदानमा बिहीबार भएको खेलमा जनकपुरले काठमाडौं गोर्खाजलाई ८ विकेटले पराजित गरेको हो।
काठमाडौंले दिएको ११६ रनको लक्ष्य जनकपुरले १७ ओभर २ बलमा २ विकेट गुमाएर पूरा गर्यो। जनकपुरको जितमा मोइन अलीले अविजित ५८ रन बनाए भने सैफ हसनले अविजित ४० रनको योगदान दिए।
यसअघि टसपछि पहिले ब्याटिङ गरेको काठमाडौं गोर्खाज १९ ओभर ३ बलमा ११५ रनमा समेटिएको थियो। काठमाडौंका भीम सार्कीले सर्वाधिक ३३ रन बनाए। जनकपुरका राहुल यादवले उत्कृष्ट बलिङ गर्दै ४ विकेट लिए।
पहिलो खेलमा कर्णाली याक्ससँग १९ रनले पराजित भएको जनकपुरले दोस्रो खेलमा जित निकाल्दै प्रतियोगितामा आफ्नो खाता खोलेको हो। काठमाडौं गोर्खाजले भने यसै खेलबाट प्रतियोगिताको सुरुवात गरेको हो।
एनपीएलअन्तर्गत बिहीबारको दोस्रो खेलमा विराटनगर किङ्ग्स र कर्णाली याक्सबीच प्रतिस्पर्धा हुनेछ। उक्त खेल साँझ ५ बजे सुरु हुने तालिका छ।
आठ टोली सहभागी प्रतियोगिता मङ्सिर ५ गतेसम्म सञ्चालन हुनेछ।
