वीरगंज । जेन–जी पर्सा तथा राष्ट्रिय स्वतन्त्र पार्टी (रास्वपा) का युवा नेता सुधीर पटेलले धादिङको गजुरी गाउँपालिकाका बाढीपीडित परिवारलाई करिब १५ लाख रुपैयाँ बराबरको राहत सामग्री वितरण गरेका छन् ।
नेता पटेलकाे नेतृत्वमा गजुरी गाउँपालिका–५ र ६ का बाढीपीडितका लागि होल्डिङ सेन्टरमा रहेका करिब २०० परिवारलाई राहत सामग्री वितरण गरिएकाे हाे । राहत सामग्रीमा चामल, दाल, आलु, प्याज, नुन, तेल, साबुन, सोयाबिन, चिउरा, दालमोट तथा लत्ताकपडालगायत सामग्री रहेका छन् ।
राहत वितरण कार्यक्रममा गजुरी गाउँपालिकाका अध्यक्ष गणेशलाल श्रेष्ठ, वडा नम्बर ५ का अध्यक्ष गोविन्द लामिछाने, वडा नम्बर ६ का अध्यक्ष भक्तबहादुर तामाङ, जेन–जी पर्साका संयोजक महादेवप्रसाद कुर्मी, प्रमुख सल्लाहकार वीरेन्द्र कण्ठ, युवा अभियन्ता तथा समाजसेवी सुशील पटेल, जेन–जीका चन्दन महतो र रोकि खानलगायतको उपस्थिति थियो ।
जेन–जी पर्साले संकलन गरेको राहत सामग्री लिएर पटेल नेतृत्वकाे टोली शनिबार वीरगंजबाट धादिङतर्फ प्रस्थान गरेको थियो । टोलीले धादिङ पुगेर बाढीपीडितको अवस्था बुझ्दै आवश्यक राहत सामग्री वितरण गरेको हो ।
बाढीका कारण प्रभावित परिवारलाई तत्काल आवश्यक खाद्यान्न तथा दैनिक उपभोग्य सामग्री उपलब्ध गराउने उद्देश्यले राहत वितरण गरिएको जेन–जी पर्साले जनाएको छ ।
